O stand de Economía Social de Galicia, co que a Consellería de Emprego e Igualdade participou na feira Xantar 2021, gañou nesta edición o premio ao mellor stand de alimentación. Os galardóns Xantar Internacional naceron cando o salón obtivo o selo de internacionalidade (en 2014) e con eles se recoñecen iniciativas públicas ou privadas que destaquen pola súa posta en valor da gastronomía e o turismo desde unha perspectiva innovadora.  

En concreto, o xurado recoñeceu que o stand de Economía Social da Xunta facilitou a presenza de cooperativas do sector agroalimentario na feira indicando, ademais, que esta fórmula empresarial xera riqueza nas zonas rurais onde se asentan e un crecemento económico sostible, así como un emprego de calidade, integrador e centrado nas persoas e no territorio. Así mesmo, co galardón valorouse o esforzo realizado polos expositores presentes que ofreceron degustacións aos visitantes.

Co stand premiado, a Xunta promocionou no salón gastronómico a economía social e os produtos e servizos que ofrece en Galicia. Deste xeito, empresas representativas da economía social e do cooperativismo achegaron os seus produtos. En concreto, participaron Condado Paradanta,  Cooperativa Agraria Provincial (Bico de Xeado), Queixeira Gaia, Alcrique, Terras da Mariña, Tres Fuciños, Barbudos, e Bodega Cooperativa Jesús Nazareno.

 

O obxectivo da Consellería de Emprego e Igualdade con esta iniciativa é promocionar a economía social, un modelo económico sustentable e próximo ás contornas

 

As persoas asistentes ao salón poideron coñecer e degustar no posto da Consellería de Emprego e Igualdade os produtos elaborados polos expositores, entre os que se atoparon  queixos, requeixos, meles, licores, xeados,  carnes, salsas e viños.

A Xunta leva anos apostando por esta fórmula económica que, entre outros valores, propugna unha economía solidaria e en sintonía co medio ambiente e a contorna onde se enmarca. Este modelo crece da man do desenvolvemento colectivo e actúa como elemento integrador das comunidades.

O compromiso do Goberno galego con este modelo faise patente nos orzamentos que a Consellería de Emprego e Igualdade ven de presentar para 2022 e que destinarán 35 millóns de euros (un 6% máis que en 2021) á difusión, creación e consolidación de empresas e a promover o emprego inclusivo a través da economía social.