Un milleiro de persoas percorren as rúas de Vigo en defensa do naval

Arredor dun milleiro de persoas participaron hoxe en Vigo na manifestación convocada pola CIG en

defensa do naval e polo futuro da comarca. Unha mobilización que arrincou da Dobrada e rematou

diante da delegación da Xunta coa que a central sindical quere amosar o seu rexeitamento a unha

nova reconversión encuberta “que acabe por afundir definitivamente o naval” e reclamar unha

intervención pública directa que reverta a privatización de Barreras e dote a ría dun estaleiro

público ou semipúblico.

“Esta manifestación é un exemplo máis de que non nos resignamos fronte á grave crise laboral,

social e produtiva que padece a comarca de Vigo, de que non quedamos de brazos caídos mentres

avanza a desertización industrial que ameaza xa non só o noso futuro senón o presente”. Deste xeito

comezou a súa intervención ao remate da marcha o secretario comarcal da CIG-Vigo, Alberto

Gonçalves.

O responsábel sindical lembrou que dende o inicio da pandemia destruíronse só na cidade de Vigo

por volta de 1500 postos de traballo nas diferentes actividades industriais, polo que na actualidade

hai 6100 empregos industriais menos dos que había en 2009. “Fronte á propaganda oficial estamos

aínda moi lonxe dunha verdadeira recuperación”, lamentou.

Neste senso, denunciou que esta situación de crise industrial continúa a agravarse sen que a Xunta

do PP nin o Goberno español de PSOE e Unidas Podemos reaccionen e actúen para poñerlle freo.

“Porque a pesar do que poida parecer, o pobo traballador non come de luces led, nin de fanfarria,

nin de propaganda”, ironizou.

Gonçalves detívose especialmente na “situación límite” do sector naval, “que corre o risco de

desaparecer tal e como coñecíamos”. Censurou que os atrancos da Autoridade Portuaria continúen a

boicotear a recuperación da actividade no antigo Vulcano, “e Barreras avanza sen freos cara un

escenario de liquidación, ao tempo que se mantén a falta de carga de traballo noutros estaleiros

como Metalships, e vemos como a industria auxiliar continúa estrangulada por causa da situación

que viven os principais estaleiros”.

Sinalou que a CIG leva moito tempo a alertar desta situación límite e a esixir que as

Administracións reaccionen e que, diante da incapacidade do capital privado, aposten por unha

decidida intervención pública que blinde o sector e garanta a continuidade da actividade produtiva e

do emprego.

Precisamente por defender con “firmeza e coherencia” esta posición a reacción de dirección de

Barreras foi a de despedir “de maneira ilegal e aberrante” ao delegado da CIG, Rafa Pérez. “O que

pretenden con esa decisión é amedrentarnos, impoñer o silencio e a mansedume servil que practican

de maneira indecente outros sindicatos no estaleiro; pero que saiban que non están a bater só contra

Rafa, téñennos a todos/as en fronte, e imos ir con toda a nosa forza, con toda a nosa capacidade de

mobilización, con toda a contundencia que nos define, até lograrmos a súa readmisión”.

Diante disto, preguntouse a que agardan a Xunta e o Goberno español para actuar. “Que máis ten

que pasar para que movan un dedo en favor do naval de Vigo? Cantos postos de traballo mais teñen

que desaparecer? Cantos traballadores/as teñen que abandonar o país e emigrar?”.

Porque para Gonçalves “non abonda con afirmar nos discursos e nas declaracións a importancia do

naval e da industria, hai que demostralo con feitos; menos palabrería e máis DOG e máis BOE;

menos xestos e máis decisións concretas”, demandou.

O máximo responsábel da CIG-Vigo apelou a unha intervención pública que reverta a privatización

de Barreras imposta polo PP de Aznar a finais dos anos 90 e que dote a ría de Vigo dun estaleiro

público ou semipúblico “co que blindar a continuidade da actividade e do emprego nun sector que

ademais de estratéxico para Vigo, a súa comarca e o conxunto de Galiza, é para nós rotundamente

irrenunciábe