As operadoras de telefonía coma R ou Movistar seguen sen atender as demandas de miles de veciños de Mos que se ven privados do dereito de ter unhas comunicacións acortes co século XXI.

A pesar do recente anuncio da administración local de acometer a principio do vindeiro ano conexións no 82% do territorio, o certo é que, entrado o mes de decembro do 2021, a fibra aínda non chega a unha importante porcentaxe de poboación e empresas ubicadas neste municipio de 15.000 habitantes.

Ata o de agora existen zonas coma a Igrexa (Torroso), Arrufana (Louredo), Herville, Outeiro (Torroso), Monte e parte de Sanguiñeda que continúan sen ter acceso a fibra. Tampouco os veciños de Igrexa (Tameiga), Cotiño (Tameiga), Fraela, Castro (Mos), Ameirolongo, Pedrapinta, Santa Marta e Veigadaña. Outras zonas de “sombra” son Os Cabaleiros, Pombal, As Angustias, Piñeiro, tramo inicial da Avenida de Sanguiñeda (Senlle) e Inxertado desde Santiaguiño e parte de Arrufana pasando por As Cortiñas ata a Estrada Nacional 550 entre outros moitos.

A fibra de R ou Movistar segue sen chegar así a unha importante parte da poboación que continúan a reclamar este servizo que pode considerarse xa básico tanto para empresas coma para particulares.