A conselleira de Medio Ambiente, Territorio e Vivenda, Ángeles Vázquez, e a alcaldesa, Cristina Fernández, asinaron a semana pasada un convenio de colaboración co que o Concello poderá acceder a un novo préstamo do Fondo de Cooperación. Ponteareas é o municipio galego que máis veces se beneficiou deste instrumento, que desde a súa posta en marcha lle está a permitir financiar 9 actuacións con créditos por un importe de máis de 1,5 millóns de euros.

Este instrumento de apoio económico, concibido para concellos de menos de 50.000 habitantes, foi impulsado polo o Instituto Galego da Vivenda e Solo (IGVS) no ano 2017 e está dotado dun orzamento global de 20 millóns de euros.

No caso concreto de Ponteareas, o crédito sen xuros ao que accede, e que poderá devolver á Xunta nun máximo de oito anos, permitirá levar a cabo a reforma e acondicionamento de dúas plantas do inmoble situado no número 13 da praza Maior, co fin de habilitar un espazo ao servizo do tecido empresarial do Concello.

 

Ponteareas é o municipio galego que máis veces se beneficiou deste instrumento de cooperación, co que está a financiar 9 actuacións con créditos por máis de 1,5 M€

 

A conselleira recordou que a evolución ascendente de axudas concedidas desde 2017 son unha mostra da consolidación do Fondo de Cooperación do IGVS como unha ferramenta de apoio útil e ben valorada polas entidades locais. Así, só este ano e incluíndo xa o convenio asinado hoxe, a Xunta concedeu máis de 4 millóns de euros a un total de 10 municipios para levar a cabo unha ducia de actuacións.

Nesta liña, subliñou que este programa supón unha solución ás dificultades coas que se atopan en moitas ocasións as entidades locais para poder acceder a vías de financiamento que lles permitan executar proxectos de interese municipal.

Por iso, salientou a importancia de que as distintas administracións públicas traballen man a man co obxectivo común de ofrecer os mellores servizos públicos ao cidadán, ao tempo que enmarcou o Fondo de Cooperación na aposta da Xunta pola rehabilitación e a posta en valor do patrimonio inmobiliario xa construído.