O delegado territorial da Xunta de Galicia en Pontevedra, Luis López, mantivo onte unha reunión de traballo con Enrique Núñez, secretario xeral da Federación Provincial de Comercio, Turismo e Mercados, e trasladoulle o “apoio absoluto” do Goberno galego ao comercio de proximidade “fronte aos importantes retos que debe afrontar no presente ano 2022”.

O representante autonómico celebrou esta xuntanza para abordar as perspectivas e as necesidades do sector “tendo en conta a súa situación e actuando de xeito transversal e complementario coas prazas de abastos, como ramo fundamental do comercio, e aproveitando o tirón do turismo, especialmente neste segundo ano Xacobeo”.

“Creo que a federación provincial está a facer un gran traballo agora que está a piques de cumprir o segundo ano desta nova etapa e dende a Xunta queremos que siga nesa liña ascendente, polo que lle trasladei a Enrique Núñez a colaboración e cooperación necesaria para seguir impulsando un sector que é importantísimo para a economía e o emprego, pero tamén para a dinamización e a vida das cidades, dos barrios, das vilas e de moitas zonas rurais”, explicou Luis López.

O delegado territorial lembrou que a Xunta activa de xeito constante “numerosas liñas de apoio ao comercio de proximidade, como o recente e exitoso Bono Comercio, ou as ordes de axudas á modernización que teñen beneficiado a centos de establecementos da nosa provincia”.

Pola súa banda, Enrique Núñez aproveitou este contacto de presentación para informarlle das principais iniciativas que está a desenvolver a federación, como a campaña de revisión de tarifas eléctricas para os comercios a través do enderezo electrónico revisamifactura@comerciogallego.es, a tarxeta de fidelización, os servizos de asesoramento xurídico, fiscal, contable e laboral e as campañas promocionais.

Neste eido, comunicoulle ao delegado territorial que a federación conta coa app Pontecomercio, que permite artellar iniciativas en ámbitos locais, comarcais ou provincial e coa que se desenvolveu unha recente campaña no Nadal. Nesta liña, a entidade pretende realizar unha “acción potente” dende a vindeira primavera baixo a denominación Pontedeprimavera.

A Federación Provincial de Comercio, Turismo e Mercados conta na actualidade con 6.500 establecementos adheridos dos 14.000 que hai en toda a provincia e ten representación das asociacións de Pontevedra, Marín, Caldas de Reis, Cuntis, Cambados, Sanxenxo, Vilagarcía, Meis, Ribadumia, A Illa de Arousa, Vilanova, Lalín, A Estrada, Vila de Cruces, Ponteareas, A Cañiza e Tomiño, o que supón o 85% das existentes.