A feira internacional de acuicultura  AquaFuture  Spain¨22, a cal terá lugar do 23 ao 25 de marzo deste ano na  Feira Internacional de Galicia ABANCA, alcanzou xa o 100% de ocupación da súa área expositiva.

Esta contratación de todo o espazo dispoñible prodúcese despois de catro ampliacións do plano inicial do evento debido á alta demanda por parte das firmas do sector e supuxo que o certame considere xa finalizada a inscrición de empresas.

Unha excelente resposta da industria acuícola que supera amplamente as expectativas iniciais da empresa organizadora,  Ok Eventos, que hai un ano empezaba a traballar no proxecto co obxectivo de chegar a 80 empresas e que finalmente contará con preto de 150 na súa exposición. Unha importante cifra á que se engade o gran interese xerado pola feira a nivel internacional, estando representados 23 países diferentes tanto de Europa como de Asia, Latinoamérica, América do Norte ou Sudáfrica.

Estas compañías conformarán a denominada  ExpoFuture, un espazo expositivo para empresas e demais entidades vinculadas á cadea de valor da acuicultura, onde poder presentar as últimas innovacións do mercado e promover o establecemento de liñas de negocio e sinerxías. Contará tamén coa presenza de organismos oficiais e institucións públicas en representación e apoio ao sector acuícola, como aposta por un sector sostible e competitivo e, por último e moi importante, co sector produtivo, mostrando a variedade, calidade e versatilidade dos seus produtos no mercado.

Un ambicioso programa

Á área expositiva da feira unirase un completo programa que incluirá xornadas técnicas, presentacións de produto e  showcookings, o cal se está ultimando para a súa presentación oficial.

Serán seis as mesas redondas que se emitirán por streaming e se levarán a cabo na sala de conferencias, a cal levará o nome de Carmen Sarasquete, en honra a esta bióloga recentemente falecida. Natural de Santa Uxía de Ribeira e licenciada pola  Universidade de Santiago de Compostela, foi a primeira muller numeraria da Academia de Medicina e Cirurxía de Cádiz sen ser médico, así como membro do Ateneo Artístico, Literario e Científico de Cádiz.

Por outra banda, durante os tres días están programadas máis dunha vintena de presentacións na sala ABANCA, mentres que na zona de Show Cookings Xacobeo 21-22 están confirmadas oito sesións culinarias con produtos acuícolas que permitirán coñecer as súas aplicacións tanto na cociña moderna como tradicional.

Gran interese do sector por visitar AquaFuture Spain´22

Ademais dunha alta demanda de empresas para participar en  AquaFuture  Spain, a organización tamén está a recibir numerosas solicitudes de acreditación por parte de empresas, grandes e pequenos produtores, investigadores e demais profesionais do sector acuícola para visitar unha feira que ten carácter profesional e unhas altas expectativas de afluencia nacional e internacional.