A compañía viguesa Señora Supina estrea este  venres 18 de febreiro no Auditorio do Concello de Vigo a comedia vodevil Hotel Europa.

“Con Hotel Europa queremos voltar aos escenarios priorizando o humor e tentando que o público ría e desfrute cos 15 personaxes que interpretan as catro actrices do equipo”, sinala Javier Lojo, director da proposta. “Os espectadores vanse a atopar ante un Hotel moi chamativo e co que pretendemos falar da perda da nosa identidade por mor da globalización e a especulación urbanística das nosas vilas”.

Hotel Europa é unha comedia vodevil áxil e divertida escrita por Ernesto Is e que conta coas actrices Raquel Crespo, Nola Drake, Raquel Ferraz e Alba Outeda, que interpretarán a unha morea de peculiares personaxes. Unha obra moi do estilo das sitcoms e cunha boa dose de intriga, na que o público poderá descubrir as divertidas e entrelazadas historias dos moradores do hotel. Con Hotel Europa, a compañía Señora Supina segue o camiño da súa exitosa comedia Cinco mulleres que comen tortilla coa que percorreron os teatros galegos, unindo comedia e o valioso papel da muller como creadoras de humor.

Hotel Europa é un espectáculo que busca reflexionar, desde a ironía e o entretemento, sobre os procesos de transformación e perda de identidade que, nos últimos anos, as vilas galegas veñen sufrindo por mor da especulación urbanística e o turismo masificado. Tras a estrea, a montaxe poderá verse en Vigo, Gondomar e Lugo, entre outros concellos de Galicia.

FICHA ARTÍSTICA

Texto: Ernesto Is

Actrices: Raquel Crespo, Nola Drake, Raquel Ferraz, Alba Outeda e Javier Lojo

Dirección: Javier Lojo

Espacio escénico e iluminación: Vanesa Regengo

Deseño de vestiario: Raquel Crespo

Espazo sonoro: Javier Lojo e Ernesto Is

Colabora: Xunta de Galicia, Concello de Vigo, Concello de Gondomar, Concello de Ribas de Sil e cía. Feira do Leste

Duración: 80 minutos