A conselleira de Emprego e Igualdade, María Jesús Lorenzana, abordou onte co presidente do Foro pola economía social galega (Foroesgal), Celso Gándara, as accións conxuntas que se levarán a cabo en 2022, ano no que Santiago é a capital española da economía social, sucedendo a Teruel. Na xuntanza celebrada en Santiago de Compostela, acordaron reforzar as actividades que forman parte do Plan operativo anual da entidade e que financia a Xunta a través dun convenio de colaboración que se asina anualmente e co programa de axudas destinado a apoiar o labor das asociacións da economía social.

O Plan operativo anual inclúe tres liñas estratéxicas con accións diferentes para cada unha delas. Do que se trata é de, en primeiro lugar, visibilizar a economía social ante a sociedade e os principais axentes económicos; representar os intereses deste modelo empresarial; e, como terceira liña estratéxica, xerar as condicións para o desenvolvemento das entidades de economía social a través da intercooperación e o acceso aos procesos de contratación pública.

Foroesgal está conformado polas cinco entidades máis representativas da economía social: Unión de Cooperativas de Galicia (Espazocoop), Asociación de Cooperativas Agroalimentarias (Agaca), Asociación Galega de Centros Especiais de Emprego (Cegasal), Agrupación de Sociedades Laborais de Galicia (Aesgal) e a Asociación de Empresas de Inserción de Galicia (Aeiga). A Consellería de Emprego e Igualdade mantén o seu compromiso con estas entidades co apoio nos últimos doce anos de máis de 7,6 millóns de euros.