A conselleira de Infraestruturas e Mobilidade, Ethel Vázquez, avanzou  que a Xunta vai rebaixar o prezo do autobús interurbano para os 150.000 veciños de 119 concellos rurais coa posta en marcha da Área de Transporte de Galicia.

Así o anunciou esta semana no Pleno do Parlamento galego, onde compareceu para dar conta do traballo desenvolvido pola Xunta nos últimos anos para renovar e modernizar todas as concesións de transporte interurbano, dotando os galegos dun transporte público por estrada eficaz, competitivo e mellor adaptado ás necesidades da xente.

Ethel Vázquez explicou que a Área de Transporte de Galicia, na que traballa o Goberno galego, suporá estender a toda a Comunidade os descontos no transporte público que xa funcionan nas áreas de transporte metropolitano, con bonificacións nos prezos dos billetes ou transbordos gratuítos, asumindo a Xunta un 80% do custo e os concellos o 20% restante. Trátase, abondou, de aplicar un modelo único de mobilidade interurbana con tarifas igualitarias para os usuarios de autobús dos 313 concellos galegos, pagando os usuarios unicamente en función da distancia.

Neste marco, e tendo en conta a atención prioritaria ao rural que está a facer a Xunta para tentar reverter o despoboamento, Ethel Vázquez referiu que aqueles municipios máis pequenos, os que teñan menos de 2.000 habitantes e un menor grado de urbanización, se incorporarán de xeito directo á Área de Transporte, asumindo a Administración autonómica o custo desa incorporación.

 

Explica que os municipios de menos de 2.000 habitantes e cun menor grado de urbanización se incorporarán de xeito directo no verán a esta iniciativa da Xunta, que suporá descontos de 0,50€ en cada viaxe e transbordos gratuítos

 

Isto, na práctica, permitirá que 150.000 veciños de 119 concellos se vexan beneficiados de xeito automático dos descontos que xa desfrutan os cidadáns das áreas de transporte metropolitano: descontos de 0,50 euros en cada viaxe no autobús da Xunta e transbordos gratuítos nas viaxes interurbanas.

Segundo detallou Ethel Vázquez, beneficiaranse desta iniciativa 69 concellos da provincia de Ourense; 30 da de Lugo; 15 da provincia da Coruña; e 5 da de Pontevedra.

A titular de Infraestruturas adiantou que en próximas semanas se vai someter a información pública a creación da Área de Transporte de Galicia para introducir estas melloras co obxectivo de elevala ao Consello da Xunta a comezos de verán para a súa aprobación. Explicou que o seguinte paso será a autorización do convenio tipo para posibilitar a adhesión dos demais concellos de Galicia e iniciar a posta en marcha efectiva da Área de Transporte de Galicia este mesmo verán.

Conquista social que supón a tarxeta Xente Nova
Na súa intervención, a titular de Infraestruturas e Mobilidade referiuse á tarxeta Xente Nova como “un antes e un despois” no transporte público, sendo Galicia pioneira en España na aplicación dunha medida que supón a gratuidade no transporte da Xunta para os menores de 21 anos en toda a comunidade.  

Referiuse especificamente ao éxito que está a colleitar esta iniciativa, que supón unha auténtica conquista social, ao facilitarlle aos mozos o acceso a servizos esenciais como a educación e incidindo tamén no seu crecemento persoal, ao abrir as posibilidades para a práctica de actividades deportivas ou culturais; pero tamén polo importante aforro que supón para as familias, de entre 500 e 1.800 euros ao ano. Puxo o exemplo dun estudante de Ferrol que se despraza todos os días á Coruña e viaxa gratis empregando a tarxeta Xente Nova, o que lle permite un aforro anual de 1.350 euros ao ano.

Ethel Vázquez apuntou que esta iniciativa social permitiu bonificar o pasado ano case 3,2 millóns de viaxes cun investimento da Xunta de máis de 4,3 M€.

Nesa aposta sen precedentes que o Goberno galego realiza polo transporte público, a conselleira referiuse a outra medida pioneira no conxunto do Estado, posta en marcha para facilitar as visitas á poboación reclusa, beneficiando a 3.000 familias. Así, explicou que o pasado 28 de xaneiro se implantaron servizos específicos aos cinco centros penais da Comunidade, ampliando itinerarios, creando novas frecuencias e axustando os horarios ás quendas de visita.

80 M€ ao ano para ofrecer un transporte moderno, útil e eficaz
Ethel Vázquez detallou o traballo desenvolvido pola Xunta nos últimos anos para modernizar todo o mapa de transporte de autobús interurbano da comunidade e dotar os galegos dun transporte propio do século XXI, moderno, útil e eficaz.

Sinalou que, baixo o principio de “nin xente sen autobuses, nin autobuses sen xente”, se implantaron novas modalidades de transporte, como o transporte a demanda e o transporte compartido, que aproveita as prazas baleiras dos escolares, sendo unha solución eficaz á mobilidade, especialmente, dos veciños do rural.

A este respecto incidiu en que o autobús compartido supuxo, por exemplo, que concellos como Riotorto, Ribeira de Piquín, Carballeda de Valdeorras ou A Mezquita, polos que antes non pasaba ningunha liña regular de autobús, agora dispoñan deste servizo co que os veciños poden achegarse ao centro de saúde, ao banco ou a facer os seus recados.

Como proba do éxito do funcionamento destas novas modalidades de transporte, Ethel Vázquez referiuse aos datos: fronte ás 464 liñas de autobús compartido existentes en 2017, agora están funcionando 2.245 liñas de autobús compartido; empezouse con 3.193 paradas cando agora hai 23.758; e de 339.254 servizos compartidos en 2017 pasouse a 892.643 que se prestan na actualidade. Expuxo tamén como mostra da incidencia social que supón este transporte o feito de que en 2021 a media mensual de usuarios xerais que empregaron o transporte compartido se situase en preto de 27.000 viaxeiros, fronte aos 5.357 do ano 2018.

En canto ao transporte a demanda, tamén experimentou un incremento de opcións importante: conta actualmente con 2.226 liñas e 20.834 paradas, e pechou o 2021 con 570.248 servizos e con máis de 12.000 usuarios que empregaron o autobús a demanda.

 

Subliña que esta iniciativa social permitiu bonificar o pasado ano case 3,2 millóns de viaxes cun investimento da administración autonómica de máis de 4,3 M€

 

Ethel Vázquez salientou que, no seu conxunto, o Plan de Transporte Público de Galicia supuxo activar 127 contratos que configuran hoxe a rede autonómica de transporte; renovar 3.436 liñas de autobús; habilitar 53.000 paradas; ofrecer ao ano máis de 2,3 millóns de horarios e percorrer máis de 57 millóns de quilómetros, movendo, de media, preto de 3 millóns de viaxeiros ao mes. Para garantir estes servizos e ofrecer aos cidadáns un transporte en autobús de calidade, a Xunta está a destinar 80 M€ ao ano.

Vázquez Mourelle incidiu en que, grazas ao Plan de Transporte Público de Galicia, se puxo ao servizo dos galegos un transporte público viable, sostible e útil, mellor adaptado ás necesidade de mobilidade da xente e máis apegado á realidade territorial de Galicia. Subliñou que o proceso de modernización levado a cabo significou a mellora e extensión dos servizos; unha modernización tecnolóxica e tamén rebaixa de prezos.

Explicou, a este respecto, que se reduciron as tarifas do billete de xeito xeneralizado: coa aplicación dun sistema de prezos homoxéneo e equitativo; con descontos especiais por recorrencia ao pagar coa tarxeta TMG, do 25% no prezo dos billetes se se superan as 20 viaxes no mesmo mes e do 50% a partir das 40 viaxes; e cunha ampla oferta de bonos que ofrece prezos moi competitivos. Por exemplo, por só 50 € ao mes é posible viaxar de forma ilimitada entre A Coruña e Ferrol e nas conexións intermedias; isto, para quen se despraza a diario, supón pagar pouco máis de 1 € por cada viaxe.

Referiuse ao Plan de Transporte Público como un plan en constante mellora e ampliación para adecuarse ás necesidades de mobilidade, cambiantes, como así o demostran os reforzos implantados nas conexións entre Ferrol e A Coruña; a adaptación dos servizos entre Culleredo e a cidade herculina; a adaptación dos horarios tras a chegada do AVE a Ourense, ou os novos servizos aos centros penais.