Abel Caballero ven de valorar que o executivo central presidido por Pedro Sánchez reverta a decisión do goberno de Rajoy e transfira aos municipios as contías derivadas da incautación do IVE de decembro de 2017. Así, Vigo recibe 2.153.000 euros.

O alcalde tamén quixo recoñecer que o Estado, para este 2022, vai abonar ao Concello de Vigo case dez millóns de euros máis que o ano anterior. As achegas do Estado se elevan dos 86,1 millóns aos 95,2 millóns, un “aumento moi importante do 13%”, en verbas de Caballero, que contrasta coa cifra que destina a Xunta de Galicia á cidade, uns cinco millóns en termos netos.

O rexedor censurou que o goberno autonómico ten “conxelada” a asignación da participación nos ingresos das Comunidades Autónomas, recollida na Constitución Española, “desde tempos inmemoriais”. Ademais, “a Xunta de Galicia non nos aumenta nada e nos dá esa ridícula cantidade de cinco millóns de euros, ridícula cando se compara cos case cen que nos dá o Goberno de España”.

Por outra banda, e no tocante ao IVE recuperado, á Xunta de Galicia lle corresponden 224,5 millóns de euros. Abel Caballero indicou que Vigo, por poboación, supón o 11% do total da comunidade autónoma, co que proporcionalmente “tería que recibir uns 24 millóns de euros” destes ingresos adicionais. “¿E canto imos recibir? Nin un céntimo”, concluíu o alcalde.