A xestora do PSOE de Ponteareas reuniuse onte con carácter de urxencia para analizar o incumprimento do pacto de goberno asinado co BNG. O PSOE de Ponteareas cualifica os feitos como “moi graves” e considera unha “falta de lealdade absoluta que se tivesen remitido uns orzamentos municipais á oposición ser haberse consensuado no seo do Goberno tal e como establece o Pacto de Goberno”.

Este mesmo luns o BNG tentou forzar unha reunión co grupo municipal socialista pretendendo así dar por cumprida a obriga da negociación.

O PSOE non vai aceptar a presión que agora intenta impoñer o BNG para aceptar uns orzamentos sen consenso previo que non recollen as necesidades para a xestión ordinaria de determinadas áreas imprescindibles para os socialistas como o emprego. “Buscamos uns orzamentos estratéxicos na liña dos fondos Next Generation do goberno de Pedro Sánchez”, afirman dende a xestora.

O BNG ten que entender que o PSOE non está no Goberno para levantar a man nun pleno a conveniencia deles. Gobernamos cun marco que é o Pacto de Goberno para aplicar unhas políticas que beneficien aos veciños e veciñas, e o BNG non o está respectando.

Engadido aos orzamentos presentarase tamén ao Pleno a modificación da RPT, documento onde aparecen todas as necesidades de persoal do concello. Este documento tampouco esta consensuado e pechado co PSOE, incumprindo así novamente o Pacto de Goberno.