A secretaria xeral da Igualdade, Susana López Abella, participou hoxe no acto conmemorativo do Día internacional da Muller organizado pola Universidade de Santiago, onde reivindicou a necesidade de seguir a traballar para erradicar os estereotipos de xénero asociados ás vocacións profesionais de carácter técnico e á elección dos estudos universitarios, unha tarefa para a que prometeu seguir coordinando actuacións cos entes académicos.

“No ensino universitario a presenza de mulleres é maioritaria”, incidiu a secretaria xeral, quen lembrou que, así as cousas, a excepción atópase nas enxeñerías e a arquitectura onde, lonxe de incrementarse a matriculación de mulleres, a porcentaxe vai diminuíndo de forma leve ao longo dos anos. Dixo que isto pon de manifesto a importancia de “seguir desenvolvendo accións para o fomento da igualdade e a erradicación dos estereotipos de xénero asociados ás vocacións profesionais e á elección dos estudos”.

Tal e como recalcou a secretaria xeral da Igualdade, a Xunta está comprometida na eliminación das brechas de xénero persistentes nos distintos ámbitos como “no acceso ao emprego, na promoción profesional e no fomento da presenza das mulleres nas esferas de decisión e influencia das estruturas sociais, económicas e profesionais”.

“As mulleres sumamos talento, como se ve hoxe aquí, as mulleres abrimos camiños, polo que é necesario que continuemos traballando no fomento da creación de postos de traballo para a poboación feminina e favorecendo o emprendemento desde a innovación, como motor de cambio e progreso do conxunto da nosa comunidade, con especial atención ao medio rural e á necesaria dinamización demográfica dos seus municipios”, fixo fincapé López Abella.

 

Amosou o compromiso da Xunta para seguir a incentivar que a elección de estudos e a vocación profesional das mulleres estea afastada de prexuízos sexistas

 

A igualdade forma parte das estratexias do Goberno galego. De aí que a Xunta siga a traballar tamén para derrubar os obstáculos que dificultan a incorporación en condicións de igualdade e a promoción profesional das mulleres en ámbitos como o da ciencia, a cultura ou o mundo do deporte.

VIII Plan estratéxico
“Ademais da aplicación de políticas específicas, resulta imprescindible seguir traballando para eliminar os roles que sustentan as desigualdades de xénero”, insistiu a secretaria xeral, quen adiantou que a Xunta está a traballar no VIII Plan Estratéxico de Galicia para a igualdade de oportunidades entre mulleres e homes para o próximo quinquenio, que incrementará os esforzos na esfera educativa e na prevención da violencia de xénero desde idades temperás, “onde a universidade ten un papel importante”, matizou.

A Xunta é consciente de que a plena igualdade no ámbito laboral só será posible se existe unha asunción equitativa do traballo doméstico e de coidados no ámbito do fogar, “por iso apostamos por un modelo de sociedade corresponsable no que homes e mulleres compartan de maneira equilibrada responsabilidades domésticas e familiares, no marco do necesario cambio cultural en torno os usos do tempo”, insistiu a secretaria xeral.