A sede dos Populares de Mos está a ser hoxe sede da votación da xornada electoral de elección de candidatos con motivo do 20 Congreso Nacional do PP no que o presidente autonómico, Alberto Núñez Feijóo, presenta a súa candidatura a presidir o partido a nivel nacional.

A sede mosense acolle hoxe as votacións da comarca da Louriña, pois está a recibir os votos dos afiliados dos municipios de Mos, O Porriño e Salceda de Caselas.

Os votantes elixen aos candidatos que optan á cada unha das Asambleas determinadas.

Desde o PP de Mos o seu voceiro e presidente do Comité Local, Camilo Augusto, a alcaldesa mosense, Nidia Arévalo, e a deputada autonómica, Feli Rodríguez Carrera, declararon que “é unha honra para os Populares de Mos acoller hoxe durante esta xornada electoral as votacións da comarca da Louriña, votacións que continúan o camiño cara a presidencia nacional por parte do noso presidente, Alberto Núñez Feijóo, do que desde Mos sentímonos inmensamente orgullosos e temos toda a nosa confianza depositada nel, pois é a mellor opción para reconducir a situación do país”.

“Hoxe Mos, Porriño e Salceda votan por un presidente, Alberto Núñez Feijóo, avalado polas maiorías e preparado para garantir unha alternativa que mellore España”, concluíron Arévalo, Augusto e Rodríguez Carrera.