A Sección Sindical da CNT do Concello de Pontevedra lanza unha campaña de repulsa polas desafortunadas declaracións públicas de Carme Fouces, Concelleira de Persoal. Ante as reclamacións do Corpo de bombeiros de que se respecten os seus dereitos en materia de conciliación a Concelleira declarou que son uns "machirulos" e incluso afirmou, ante a solicitude do permiso de lactación, que a ver se eles ían a dar a teta.

O persoal do Corpo de bombeiros responde nunha carta ao que consideran un grave ataque cara a eles e cara aos esforzos de cara a igualdade efectiva que están impulsándose dende as diferentes administracións. Ademais sinalan o "clasismo" que deixa entrever a Concelleira coas súas palabras, ao considerar demasiado boas as instalacións para unha categoría C2, unha das máis baixas dentro da escala de funcionarios.

O pasado venres 25 de marzo os traballadores e traballadoras municipais do Concello de Pontevedra recibiron, a través da aplicación empregada para a xestión de expedientes e tamén a través do seu correo corporativo, un documento asinado pola Concelleira de Persoal, a Sr. Carme Fouces Díaz no que culpa aos seus representantes da actual situación de falta de dialogo e de agochar intencións políticas non sindicais.

A situación de bloqueo na que se atopan as negociacións no Concello de Pontevedra queda patente cando ningún sindicato quere negociar coa Sra. Fouces por irrespectuosa e pola súa negativa a falar das reivindicacións dos e das traballadoras. Dende a Sección Sindical da CNT solicitan un cambio de actitude que permita desbloquear unha situación insostible, e que a fin de contas prexudica a toda a cidadanía.