Desde o Círculo Cultural Abrente e a concellería de Cultura e Turismo, que dirixe a edil Sara Cebreiro, anímase á toda a veciñanza, tanto de Mos como doutros municipios, a gozar da iniciativa organizada polo Abrente en colaboración co Concello de Mos e a Asociación de Gaiteiras Galegas, que leva por título: Tradición en Camiño.

Celebrarase o vindeiro domingo 8 de maio e, durante toda a mañá, 6 bandas de gaitas que suman un total de 170 músicos (entre gaitas e percusión) tocarán en 4 ubicacións diferentes de Mos, todas elas ao pé do Camiño de Santiago Portugués ao seu paso pola localidade mosense.

As localizacións e horarios previstos son os seguintes: ás 10.00 horas Capela das Angustias en Sanguiñeda, ás 11.15 horas Albergue de Peregrinos da Veigadaña, ás 12.30 horas Pazo de Mos, e ás 13.45 horas Capela de Santiaguiño en Guizán.

Os grupos musicais que amenizarán esta xornada de música tradicional ao pé do Camiño de Santiago ao seu paso por Mos son: Banda de Gaitas de Herville, Grupo de Gaitas Nosa Terra, Xiada Gaiteiros Refrescantes, Banda de Gaitas Airiños do Castelo, Grupo de Gaitas Son do Abrente e Gaiteiros da Ruada.