Se a imaxe da primeira edición incidía no carácter familiar dunha feira que naceu co obxectivo de espertar a curiosidade daquelas persoas que nunca se expuxeron ao veganismo como estilo de vida, este ano 2022 o cartel da feira preséntanos un momento roubado de VEGANA 2021. En palabras do deseñador da imaxe, Iñaki Quenerapú, “había demasiadas fotografías con máscara e encantounos esta foto pola espontánea gargallada da moza. Esa pequena burbulla sen máscaras que formaron estas catro persoas comendo representa, como o mellor dos presaxios, o paso de VEGANA 2021 a VEGANA 2022; é dicir, unha feira vegana co mesmo bo ambiente pero na que poderemos ver, ao fin, as caras riseiras”.

A nova edición da Feira, VEGANA 2022, comprométese a repetir a clave do éxito da primeira mostra, isto é, a feira será un punto de encontro para todo tipo de persoas curiosas e/ou comprometidas coa sostibilidade, o respecto interespecie e o medio ambiente. Deste xeito, o público asistente poderá probar as últimas novidades gastronómicas do sector vegano, deixando tamén un espazo destacado para o calzado e a moda sostible, a cosmética, o sector vinícola e cervexeiro, a artesanía, os xoguetes para todas as idades, pequenos electrodomésticos e todo tipo de alternativas ao plástico dun só uso.

Como non podía ser doutro xeito, tamén haberá espazo para asociacións, santuarios de animais e refuxios, que mostrarán o necesario e extraordinario que é o seu traballo.

Que ofrecerá VEGANA 2022
Cun intenso programa en proceso, as organizadoras do evento (as creadoras de contido Patricia Menéndez e Tamara Alonso, xunto a xestora cultural Ana Gontad) avanzan unha serie de novidades que poderán gozar as persoas que acudan ao Instituto Feiral de Vigo os días 1, 2 e 3 de xullo.

A primeira delas ten o obxectivo de ampliar a vertente inclusiva da feira. Trátase da chamada Hora Low, un espazo temporal (entre as 10:45 h e as 12 h do venres 1 de xullo) máis amigable para as persoas neurodiverxentes ou con hipersensibilidade. As persoas que padezan algún tipo de neurodiverxencia terán acceso prioritario desde as 10:45 h do venres para evitar aglomeracións. Durante unha hora minimizarase o ruído no posible neste tipo de eventos, os teléfonos permanecerán en silencio e utilizarase un ton de voz baixo. Tamén se reducirá a iluminación dentro das posibilidades da sede. Así mesmo, a organización poñerá ao dispor de todas as persoas que os necesiten uns auriculares de cancelación de ruído.

Outra das novidades deste ano é a conversión dos dous pavillóns do IFEVI que acollerán VEGANA 2022 nun gran taboleiro de xogo repleto de desafíos, probas e enigmas da man de Skeirrum, un xogo creado pola clarinetista Cintia Lomba e a química Erea Rodríguez que promete altas doses de adrenalina, recompensas e, sobre todo, moita diversión.

 

O evento contará co dobre de espazo expositivo, casetas e marcas expositoras, oengués, gastronetas, degustacións gratuítas, charlas, demostracións de cociña e unha importante oferta de lecer para todas as idades

 

En canto á oferta gastronómica que o público poderá probar, esta preséntase máis ampla que a xa variada oferta da pasada edición, coa incorporación de novas carnes vexetais, novas marcas de queixos elaborados a base de froitos secos (nin máis nin menos que dez marcas de queixos sen ingredientes de orixe animal), unha boa carta de sobremesas veganas (a maior parte sen glute) e mesmo novas alternativas veganas ao peixe. O cambio estacional da feira, que pasa do outono ao verán, permite ademais a incorporación de novas marcas de xeados e os deliciosos á vez que nutritivos produtos frescos da horta galega. Un destes produtos de horta, o cogomelo shiitake, sorprenderá a propios e estraños na súa versión “Shiitake á feira”, unha revisión do prato estrela da gastronomía galega que será preparada polos membros da Asociación Raiceiras e que marabillará ao máis padal máis sibarita. Os beneficios recadados pola asociación reverterán directamente sobre as persoas e familias en situación de vulnerabilidade da comarca do Baixo Miño.

E como o que nunca pode faltar é o humor, VEGANA 2022 promete moito e por milleiros na súa proposta Vegan Dates, un xogo de citas rápidas para coñecer xente con inquietudes e ilusións comúns.

No que respecta á oferta de obradoiros dedicados ao público infantil, a organización salienta o Mini Chef porque “somos conscientes de que as nenas e os nenos aprenden por imitación e gozan da cociña tanto como as persoas adultas”. Esta actividade, gratuíta —como todas no interior da feira—, permitirá ao público máis pequeno da casa desenvolver as súas calidades culinarias nunha contorna de aprendizaxe e gozo totalmente seguro.

Tomen nota: as entradas para o evento están dispoñibles para a súa adquisición na web vegana.gal. O seu prezo en venda anticipada é de 4,5 € para un día e 12 € para os tres días. A entrada é gratuíta para menores de 12 anos, maiores de 65, persoas en situación de desemprego e persoas en situación de diversidade funcional.

A feira conta co patrocinio principal do Concello de Vigo, o apoio da Deputación de Pontevedra e a colaboración de The Vegan Agency, Violife, Heura, Unión Vegetariana Española, Grupo Avanza, Radio Vigo Cadena Ser, Gadis e +Cociña.