As entidades locais van contar con máis de 15.000 millóns de fondos europeos para a recuperación para financiar os seus proxectos, unha cifra que supera en máis de sete puntos a porcentaxe prevista pola Federación en 2021. Así o sinalou o Presidente da FEMP, Abel Caballero, durante a súa intervención #ante a Xunta de Goberno da Federación mantida esta mañá: “Está a ser un éxito inenarrable. E iso son investimentos e máis investimentos”.

Para Caballero, que subliñou o traballo que a Federación está a realizar na xestión destes fondos, é fundamental abordar a ampliación dos prazos de execución con que contan os gobernos locais, “prazos que, en ocasións son tan axustados que fan moi difícil a realización dos proxectos e supoñerían a devolución de fondos”. O Presidente citou algúns exemplos -relacionados co establecemento de zonas de baixas emisións ou en comercio, entre outros- e referiuse tamén á necesidade de estender a outros ámbitos a posibilidade coa que xa contan os proxectos de Plans de Sustentabilidade Turística de incorporar o financiamento do IVE como gasto subvencionable.

Na súa intervención, Abel Caballero deu a coñecer o Informe de Seguimento dos Fondos Next Generation EU nos gobernos locais que se elaborou desde a FEMP (dispoñible na web da Federación), e citou algunhas liñas xa asignadas e en desenvolvemento en materia de sustentabilidade turística, cultura, educación, inclusión social, Zonas de Baixas Emisións, transformación dixital e modernización de entidades locais, e inclusión social, entre outras.

Doutra banda, e a efectos de facilitar a xestión destes fondos, hoxe, tras a Xunta de Goberno, quedou constituída a Comisión de Seguimento dos Fondos Europeos da FEMP.

CNAL e plusvalía

En referencia ás plusvalías, a FEMP insistiu na necesidade de compensar aos gobernos locais pola perda recadatoria que supón a nova normativa deste tributo, porque, en palabras de Caballero, “é unha fonte de financiamento importante, e se cae, hai que compensala”. Para estes efectos, explicou, remitiuse unha carta á ministra de Política Territorial na que se lle expón que esta cuestión e outras, como a relativa a fondo de transporte, sexan abordadas nunha Comisión Nacional de Administración Local, CNAL, que ha de convocarse o máis axiña posible. Para esa mesma CNAL propuxéronse temas que recolle outra carta, neste caso remitida á ministra de Facenda, entre os que figuran a necesidade de resolvelos problemas para a contratación derivados da subida de prezos dos materiais en obras xa contratadas; os remanentes, liquidacións de anos precedentes, compensacións adicionais por liquidacións negativas e transferencias no marco do financiamento local; así como avances nas medidas destinadas aos concellos vulnerables e en difícil situación económica.

Convenios e acordos

Nesta reunión a Xunta de Goberno aprobou tamén a próxima firma de dous convenios de colaboración da Federación co Ministerio do Interior, un deles coa Dirección Xeral de Protección Civil e Emerxencias, e outro coa Secretaría Xeral de Institucións Penais, relativo ao cumprimento de penas en beneficio da Comunidade.

Tamén se aprobaron o documento con Medidas para a Mellora da Eficiencia Enerxética nas Cidades e unha Declaración Institucional con motivo do Día Internacional do Orgullo LGTBI, o próximo 28 de xuño, “unha xornada para seguir mobilizándose por unha sociedade diversa e respectuosa coas diversidades de xénero, capaz de erradicar o odio e as discriminacións; para seguir profundando na democracia e os seus dereitos. (…) Desde as institucións debemos asegurar a igualdade efectiva de todas as persoas LGTBI e as súas familias, como elemento esencial dunha boa convivencia para o progreso e o desenvolvemento social”, segundo recolle o texto aprobado.