A delegada territorial da Xunta en Vigo, Marta Fernández-Tapias, tivo a oportunidade de compartir unha xornada cos 27 alumnos e alumnas do CEIP Javier Sensat que participaron no programa “O Golf na Escola” no marco dos Xogos Galegos Deportivos en Idade Escolar (Xogade).

A representante autonómica visitou aos escolares na última sesión desta actividade, que combina formación teórico-práctica, no Real Aeroclub de Vigo, e xuntos puideron coñecer as instalacións do campo de golf vigués e pór en práctica esta modalidade deportiva a través dun torneo de mini-golf ou Pitch-Putt (golf de iniciación).

Tal e como sinalou Fernández-Tapias, o obxectivo desta iniciativa é “a promoción da saúde, a condición física e o benestar, sen esquecer nin deixar de lado o rendemento deportivo, pero asegurando que todos os escolares poidan ter acceso á práctica de actividades físico-deportivas sen que exista ningún tipo de discriminación”.

 

Neste curso, un total de 204 alumnos e alumnas de quinto de primaria de 7 centros educativos da cidade se inician nesta modalidade deportiva

 

“Apostamos por un modelo deportivo orientado á participación, humanista, educativo e saudable, adaptado ao modelo de deporte promulgado dende o Consello de Europa a través da Carta Europea do Deporte”, anotou.
Este curso, un total de 204 alumnos e alumnas de quinto de primaria do CEIP Pintor Laxeiro, Illas Cíes, Canicouva, Igrexa de Candeán, Carballal de Cabral, Javier Sensat e do CPR Don Bosco se inician nesta modalidade deportiva.

A Xunta en colaboración das federacións deportivas galegas e as agrupacións deportivas escolares convoca, no comezo de cada curso escolar cunha duración de setembro a xuño, o programa Xogade, que inclúe actividades deportivas escolares e federadas.

Ademais, propóñense ao abeiro deste programa outras actuacións como ‘Coñece o meu club’, ‘Proxecto de vida activa e deportiva’, ‘Xogando coa auga e co vento’, ‘Xogos tradicionais e populares’ e ‘Espazo lúdico’, así como actividades de promoción de escalada, golf ou loita, ás que se engaden deportes urbanos como breaking, skate ou BMX consonte a evolución da demanda deportiva nos últimos anos e a consolidación das novas modalidades olímpicas.