A Xunta de Goberno Local acordou iniciar as actuacións para prolongar a actual execución do túnel baixo a Porta do Sol -cofinanciadas con fondos FEDER da Unión Europea dentro do proxecto Vigo Vertical- ata o inicio de Torrecedeira, por debaixo do Barrio do Cura. Así, a peonalización da Porta do Sol terá continuidade en Elduayen -onde xa non sairía o tráfico rodado- e no Paseo de Alfonso.

“Cremos que a peonalización de Porta do Sol ten que continuar no Paseo de Alfonso e isto significa que o túnel, en lugar de emerxer na rúa Elduayen, ten que saír en Torrecedeira”, explicou Caballero. Para levalo adiante, o goberno de Vigo comeza un procedemento conducente á prolongación do paso soterrado que se está a executar baixo a Porta do Sol e Elduayen, e que supón a realización de prospeccións arqueolóxicas.

Segundo avanzou o alcalde, baixo o Paseo de Alfonso existen restos da antiga muralla que circundaba a cidade. O Concello prevé realizar escavacións para delimitar a súa localización exacta e contar “con todos os informes arqueolóxicos precisos para que o túnel evite a muralla”, actuando en consecuencia “co respecto absoluto a todos os restos arqueolóxicos”.

A pretensión municipal é facer compatible o túnel cos vestixios existentes, para o que se valerá dos estudos arqueolóxicos pertinentes, resultado das escavacións que se realizarán. Así, o paso rodado inferior conectaría Policarpo Sanz co inicio da rúa de Torrecedeira, liberando do tráfico a Porta do Sol, Elduayen e o Paseo de Alfonso. “Unha nova concepción da cidade”, valorou Abel Caballero: “Continuamos peonalizando, dando calidade de vida, permitindo o desenvolvemento do comercio e da hostalería, e co respecto total á arqueoloxía e aos vestixios da historia da cidade”, concluíu.