O Bloque Nacionalista Galego alerta de que Vigo non conta desde xuño co número mínimo de bombeiros para garantir a seguridade en plena vaga de calor e incendios que arrasan en toda Galiza. A fronte nacionalista acusa desta situación á “nefasta” xestión do goberno de Abel Caballero, que se traduce en que moitos días do verán o corpo de emerxencias apenas contou con entre 12 e 14 bombeiros por xornada. 

“Vigo non dispuxo nin un só día dos 20 bombeiros que se establecen como mínimo para o operativo que ten que garantir a seguridade de todas as viguesas e vigueses”, advertiu o concelleiro do BNG de Vigo, Xabier P. Igrexas, en base a datos contrastados aos que tivo acceso a fronte nacionalista.

Igrexas reclamou explicacións “urxentes” do Goberno municipal, así como a adopción de medidas “inmediatas” por parte da responsábel da área de Seguridade, Elena Espinosa, diante do contexto de vaga de calor e dos incendios que arrasan nestes días o conxunto do territorio galego. Nese sentido, o edil nacionalista lamentou que as distintas administracións non teñan aprendido “nada” despois da experiencia “nefasta” dos lumes de 2017 na cidade.

 

Denuncia que, cinco anos despois dos graves lumes que asolaron a cidade, nin Concello nin Xunta teñan posto ningún recurso para despregar o prometido anel verde

 

Así, o concelleiro do BNG denunciou que as comunidades de montes locais seguen sen dispoñer dos recursos necesarios para protexer os espazos naturais da cidade pola falta de apoio tanto do Concello de Vigo como da Xunta de Galiza. “A estas alturas do ano 2022, e cinco anos despois dos graves lumes, non se avanzou nin un só metro do prometido anel verde”, recriminou. 

O edil nacionalista chamou ao goberno de Abel Caballero a actuar con “responsabilidade e axilidade” para reforzar o corpo co número suficiente de efectivos. “É urxente garantir a seguridade en Vigo, singularmente, nos seus montes diante do risco crecente dos lumes”.