O novo Porsche 911 GT3 RS non oculta as súas intencións: está deseñado sen compromisos para obter o máximo rendemento. Este deportivo de altas prestacións, con 525 cabalos de potencia (386 kW) e homologado para o seu uso na estrada, benefíciase dos avances tecnolóxicos e conceptos desenvolvidos no mundo da competición. Herda do 911 GT3 R de carreiras o seu motor atmosférico de altas revolucións e a súa construción lixeira intelixente, aínda que o que conecta máis directamente ao 911 GT3 RS co seu irmán de competición son os sistemas aerodinámicos e de refrixeración.

Un elemento crave para aumentar significativamente o rendemento é o concepto de radiador central, unha idea que se utilizou por primeira vez no 911 RSR, gañador da súa categoría en Le Mans, e posteriormente no 911 GT3 R. En lugar do deseño de tres radiadores visto en modelos anteriores, o novo 911 GT3 RS dispón dun gran radiador central inclinado na parte dianteira do automóbil, situado onde se atopa o maleteiro noutros Porsche 911. Isto permitiu aproveitar o espazo que se liberou nos laterais para integrar elementos aerodinámicos activos. Así, os diversos deflectores regulables de forma continua na parte dianteira e no alerón traseiro de dúas pezas, en combinación con outra serie de compoñentes aerodinámicos, proporcionan 409 quilogramos de carga aerodinámica total a 200 km/h. Isto significa que o novo 911 GT3 RS xera o dobre de carga aerodinámica que o seu predecesor da xeración 991.2 e o triplo que o 911 GT3 actual. A 285 km/h, a carga aerodinámica total é de 860 kg.

Por primeira vez nun Porsche de produción en serie instalouse un sistema de redución de resistencia ao aire (drag reduction system, DRS). Para lograr unha baixa resistencia e velocidades máis altas nas seccións rectas da pista, o DRS permite colocar as ás nunha posición plana con só presionar un botón, dentro dunha marxe de funcionamento específico. A función de aerofreno actívase durante o freado de emerxencia a velocidades altas: as ás da parte dianteira e traseira axústanse verticalmente, creando un efecto de desaceleración aerodinámica que complementa aos freos.