Volven ser noticia os restos arqueolóxicos atopados tralas primeiras obras do Celta en Mos, polo que a bancada socialista quere incidir en que levan anos denunciando este feito nas sesións plenarias do concello, cuestión a que, segundo aseguran, "o goberno local din que nunca prestaron interese". Engaden que "o PP mostra unha clara deixadez ante un descubrimento de tal magnitude ca súa actitude".

Os socialistas queren resaltar que "os informes do Servizo de Patrimonio da Xunta fan referencia a este restos da Idade de bronce alegando que estaban moi deteriorados e polo tanto pódense arrasar". Ademais inciden en que esta cata "foi feita despois de que fose público os restos atopados e imposible esconder". Os socialistas chegan a cuestionar que "de non facerse público o feito, non se faría a cata".

A voceira socialista, Victoria Alonso, alerta de que no perímetro para o que se acaba de aprobar o Plan Especial "poderían atoparse máis restos do poblado debido a cercania cos restos atopados ata a data". Denuncia que "a Xunta é participe neste atentado contra o noso patrimonio e cuestiona a forma na que din defender restos atopados noutros concellos, mentres que nos concellos do PP permiten que se perdan un restos tan antigos coma estes".