Co obxectivo de concienciar sobre a tenencia responsable de mascotas e fomentar a adopción de animais de compañía, o Concello de Tomiño pon en marcha ‘Peludos en apuros’, unha xornada de sensibilización e adopción de cans e gatos que se celebrará este sábado 1 de outubro de 10.00 a 14.00 horas na Praza do Seixo.

 

Organizada polo grupo de voluntariado da OMIX de Tomiño, durante toda a mañá do sábado a Praza do Seixo converterase en lugar de encontro para posibles adoptantes, onde voluntarios e voluntarias vinculadas ás protectoras participantes informarán a visitantes sobre o problema do abandono, ademais de asesorar sobre como adoptar unha mascota. Tamén haberá photocall gatuno e canino e recollida de alimentos e materiais que serán entregados ás protectoras de animais.