A Xunta reforza os servizos de autobús autonómico en máis de 4.000 prazas para cubrir a demanda das fins de semana deste mes de setembro e en 1.500 prazas adicionais entre semana para responder ás necesidades de desprazamentos dos usuarios do transporte público de Galicia, incrementadas polos descontos que se aplican desde o 1 de setembro.

A conselleira de Infraestruturas e Mobilidade, Ethel Vázquez, salientou que as bonificacións do 50% que se están a aplicar desde o 1 de setembro nos autobuses autonómicos están a provocar un efecto chamada, que se traduce nun forte incremento da demanda.

Incidiu en que, ata o momento, eses descontos están sendo asumidos integramente pola Xunta, xa que o Goberno de España nin transferiu os fondos necesarios, nin concretou o importe, nin tampouco a data de pago.

Estes descontos estanse a aplicar nas máis de 3.400 liñas autonómicas, pero tamén no transporte marítimo da ría de Vigo e no tren na comarca de Ferrol, ademais de nos autobuses urbanos de Ferrol e de Pontevedra, cidades nas que a Xunta presta ese servizo, pese a ser competencia municipal.

Ethel Vázquez subliñou que, só na 1ª quincena de setembro, o importe das bonificacións aplicadas no autobús da Xunta ascenden a preto de 1 millón de euros e teñen impulsado un crecemento no uso do autobús do 40% con respecto ao mesmo período do pasado ano.

Falta de alternativa ferroviaria
A conselleira detallou que os descontos están a incidir, especialmente, nun incremento da demanda nas conexións nas que non hai alternativa ferroviaria, como o traxecto A Coruña- Ferrol, onde a Xunta aumentou 100 prazas nas expedicións de hora punta.

Criticou que o Goberno de España, a pesar das reiteracións da Xunta, aínda non recuperou a día de hoxe a totalidade dos servizos ferroviarios tras a pandemia, negándolles aos usuarios unha alternativa competitiva e fiable.

Lamentou, tamén, a improvisación do Executivo central fronte ao previsible incremento da demanda ante a gratuidade do servizo, o que esta a xerar caos nas estacións e moitos inconvenientes e molestias ás persoas que empregan diariamente o tren para desprazarse diariamente aos seus lugares de traballo e de estudo.

Ethel Vázquez lamentou que o Goberno de España trate de ocultar a súa ineficiencia e falta de planificación, e que as súas solucións sexan pedirlle aos usuarios do tren que eviten as horas punta, botándolle incluso a culpa dos fallos dun sistema de reservas que depende exclusivamente de Renfe.

Neste sentido instou ao Goberno de España a ir máis alá dunha rebaixa de 4 meses nos servizos de tren, co restablecemento das frecuencias que aínda non se recuperaron tras a pandemia, ofrecendo servizos eficientes, e mobilizando investimentos en infraestruturas que permitan modernizar a rede ferroviaria, ademais de dotar as cidades galegas dos trens AVRIL que comprometeu para este verán e aínda non sabemos cando van estar.

Seguimento continuo
A conselleira reiterou que a Xunta realiza unha permanente análise e revisión das 3.400 liñas activas e dos 1.800 autobuses que percorren o territorio galego.

Puxo como exemplo os axustes efectuados entre o venres 16 e o domingo 18 de setembro, ofertando 4.012 prazas máis en 33 expedicións: Santiago- Vigo, Santiago-Sarria, Santiago-Vigo, Vigo-Pontevedra, Santiago-Lugo, Ourense-Vigo e Vigo-Ourense.

No itinerario A Coruña-Ferrol e Ferrol-A Coruña, precisou que se sumaron 385 prazas máis ás 463 existentes, ofertando 848 en total; e na ruta Ourense-Vigo e Vigo-Ourense, 7 autobuses de reforzo aos 14 existente, ata chegar a 326 prazas.

Aposta da Xunta polo transporte público
Ethel Vázquez contrapuxo esta situación de carencias nos servizos de ferrocarril, por parte do Goberno estatal, coa aposta que a Xunta vén materializando para que o autobús sexa a principal alternativa de mobilidade para a maioría dos galegos.

Para isto, subliñou que a Xunta inviste cada ano 80 millóns de euros co fin de permitir que o autobús chegue a máis sitios, teña máis conexións e frecuencias e dispoña dos reforzos necesarios para atender axeitadamente a demanda.

Incidiu en que a Xunta fai un seguimento continuo dos servizos de autobús que presta, implementando melloras alí onde son necesarias para atender axeitadamente a demanda.

 

Ethel Vázquez Mourelle destaca o efecto chamada das bonificacións do 50% activas desde o 1 de setembro no autobús autonómico, cuxo custo está a asumir a Xunta integramente ante a falta de previsión do Goberno de España

 

E iso mesmo tamén no transporte escolar, que cada día traslada a 80.000 estudantes de 774 centros, con 1.600 rutas e 14.000 paradas.

Indicou que as 127 concesións de transporte público activas a través das máis de 3.400 liñas de transporte interurbano permiten chegar a máis lugares e ofrecer máis conexións, , con máis de 55.000 paradas; con 1.800 autobuses circulando que ofrecen 2,35 millóns de expedicións ao ano; case 3 millóns de viaxeiros trasladados nun mes; e 23 millóns de horarios.

Neste sentido, remarcou que desde o ano 2016 as catro provincias galegas duplicaron o número de liñas, paradas e servizos.

Tamén apuntou que 130.000 mozos viaxan gratis no autobús interurbano grazas á tarxeta Xente Nova, tendo bonificado ata agosto case 2,9 millóns de viaxes cun investimento de 4,7 millóns de euros.

Destacou que a tarxeta Xente Nova contribúe á economía das familias, xa que reporta un aforro medio anual que rolda os 1.000 euros, podendo acadar os 1.800 euros anuais.