O CDL do Torrón acolle o obradoiro dual de emprego “Rehabilita Salceda” que formará e empregará a 20 persoas que traballarán reformando e rehabilitando a casa do mestre anexa a aula de San Xurxo, o tellado da aula de Picoña, ambas pertencentes ao CRA Raiña Aragonta, e no acondicionando dun espazo municipal para o almacenamento selectivo de refugallos.

O alumnado-traballador seleccionouse a través de oferta presentada no Servizo Público de Emprego de Galicia da Xunta, e tras superar as probas dun tribunal avaliador segundo as bases aprobadas, e será empregado a través dun contrato de formación e aprendizaxe.

Para levar a cabo o proxecto contratouse persoal directivo, docente e de apoio, que xestionará e executará o proxecto dende o propio CDL O Torrón en Salceda a parte formativa. Esta complementarase coa alternancia de traballo e práctica profesional no concello de Salceda, para así recibir unha formación profesional adecuada á ocupación elixida.

Marta Mariño Xefa Territorial de Emprego e Igualdade de Vigo explica que dende a Xunta de Galicia sempre se apostará polos obradoiros de emprego como ferramentas para combinar de forma axeitada a formación teórica e a práctica e obter bos resultados para mellorar a capacidade de inserción laboral do alumnado-traballador participante.

Verónica Tourón alcaldesa e concelleira de emprego e formación sinala que “Para o concello é importante porque o seu traballo redundará no benestar da veciñanza de Salceda”.