O Nadal quenta motores no Rosal. O Concello abre este luns 7 de novembro ás 09.00 horas o prazo de inscrición para participar no mercado de Nadal, “un espazo de oportunidades para as persoas que realizan traballos relacionados coa artesanía e o deseño, un lugar que permite visibilizar o traballo e talento creativo e innovador das persoas creadoras, artistas e artesás”, explica a alcaldesa, Ánxela Fernández Callís.

O mercado de Nadal celebrarase os días 3 e 4 de decembro no salón de exposicións do Concello de 11.00 a 14.00 e de 17.00 a 21.00 horas. As persoas interesadas en ter un posto nel deberán presentar a súa solicitude de participación por Rexistro de entrada ata o vindeiro 22 de novembro. O mercado está aberto a asociacións sen ánimo de lucro, vendedores e vendedoras de produtos gastronómicos (repostería, mel, queixos, marmeladas, turróns...) e persoas artesás dedicadas a diferentes sectores como roupa, complementos, xoguetería, deseño gráfico, fotografía, ilustración e deseño doutros produtos en xeral.

Haberá un máximo de 15 postos que se concederán por estrito orde de entrada da solicitude no rexistro do Concello. Soamente se dará un único posto por participante, que deberá traer a súa propia instalación e decoración, que deberá ser o máis atractiva posible e axeitada á temática de nadal.