O candidato á presidencia do Partido Popular de Salceda, Santiago Rodríguez Davila, incluirá na súa executiva a Ana Cristina Pérez como vicepresidenta e a Pablo Caballero como secretario, dun comité local que renovará nun 40%. Un equipo que, segundo sinala o candidato, “representará a todas as parroquias do noso concello e traballará en todas as áreas que afectan e preocupan aos veciños de Salceda de Caselas. O obxectivo é traballar arreo, escoitando, facendo propostas e recollendo suxestións para plasmar todo ese traballo no programa electoral co que o PP se presentará ás municipais de maio, e ofrecer un proxecto serio, real e para todos os veciños. Teremos un gran equipo para ofrecer un gran Goberno”.

Deste xeito, sinala Rodríguez Davila, confían en sumar eses 100 votos que en 2019 os separaron da maioría absoluta e do Goberno local. “Saímos a por todas. Traballaremos arreo para conseguir a maioría suficiente para Gobernar e estaremos preparados para facelo desde o primeiro minuto. Sen condicións, sen cesións, e cun programa e unha folla de ruta coñecida”, sinala. Nesta liña, di que “non se pode repetir que gobernen Salceda de Caselas os partidos que perderon as eleccións, e que a alcaldía estea en mans do partido menos votado polos veciños”.

O candidato sinala que "formará un equipo forte e preparado para conseguir eses 100 votos que nos separan da maioría absoluta e do Goberno".

Estes nomeamentos faranse efectivos unha vez celebrado o congreso local do partido. O candidato agradece, asemade, o apoio unánime que todos os afiliados lle deron ao apoiar a súa candidatura, que foi a única que se presentou para presidir o partido local. E recorda que “somos o único partido de Salceda de Caselas que celebra congresos abertos e nos que pode participar calquera afiliado, damos voz e a oportunidade de debater e votar o que queren que sexa o PP. Os demais partidos xúntanse en asembleas pechadas e internas para decidir entre uns poucos quen vai ser a persoa candidata”.

O 5º Congreso local do PP de Salceda de Caselas celébrase este domingo, 27 de novembro, no Auditorio municipal. Ademais de representantes autonómicos do partido, alcaldes e voceiros da comarca, contará coa asistencia do presidente provincial, Luis López, e da secretaria xeral, Luisa Piñeiro.