A Xunta salienta en Bruxelas a importancia de apoiar o sector da automoción

O director do Igape, Fernando Guldrís, participou hoxe en Bruxelas no Roundtable event on the mobility transition pathway, unha xornada na que afondou, con outros axentes do sector, no actual escenario da industria da automoción. Neste marco, Guldrís defendeu a necesidade de seguir sumando esforzos xunto ao sector para avanzar cara a nova mobilidade eléctrica, sustentable e conectada.

Así, o director do Igape avogou pola posibilidade de crear a nivel europeo un Fondo Especial de Transformación que facilite á industria a súa adaptación ás necesidades marcadas por esta mobilidade sostible, e que aglutine a aquelas rexións cun maior peso do sector. Así mesmo, Guldrís  defendeu  a importancia de acometer un reparto descentralizado dos fondos Next Generation, que resulte transparente e áxil. “Estamos no momento adecuado para poñer todos os recursos dispoñibles ao servizo da dobre transformación dixital e sostible que afronta a industria”, incidiu.

 

Reitera a necesidade de impulsar un Fondo especial de Transformación que facilite a adaptación do sector á nova mobilidade

 

Guldrís lembrou que o sector está a sufrir unha das transformación máis grandes da súa historia nas que a transición xusta ou a electrificación son puntos centrais do cambio de paradigma actual. Un escenario no que, subliñou, o Goberno galego está xa a impulsar a Axenda Enerxética de Galicia, que inclúe 145 millóns de euros para promover o vehículo eléctrico, o corredor verde do norte peninsular e a transformación das frotas de transporte.