O goberno galego investirá case 28 m€ en reformar máis de 1.100 paradas de bus

O Consello da Xunta deulle  luz verde ao programa para actuar en máis de 1.100 paradas de autobús en estradas autonómicas co fin de mellorar a súa seguridade e accesibilidade, o que suporá un investimento de case 28 millóns de euros.

A Consellería de Infraestruturas e Mobilidade, a través da Axencia Galega de Infraestruturas, xa está a traballar en 21 proxectos que se están redactando para mellorar as paradas de autobús e a súa contorna.

Nas vindeiras semanas someteranse a información pública os primeiros proxectos, xa que algunhas actuacións implican expropiacións. Así, a finais de marzo prevese ter licitadas 10 obras, cun investimento de 13,4 M€, avanzando na contratación do resto das actuacións nos seguintes meses, ata completar os 27,96 M€ de investimento total previsto.

Estas actuacións serán financiadas con fondos MRR do programa Next Generation do Mecanismo de Recuperación e Resiliencia e, previsiblemente, tamén con  fondos FEDER 21/27.

Esta iniciativa enmárcase o Plan de infraestruturas para unha mobilidade segura, verde e intelixente da Xunta de Galicia.

Actuacións
No marco destas intervencións, en primeiro lugar, revisarase se a localización da parada é a axeitada. A localización óptima destas infraestruturas é en tramos rectilíneos e con visibilidade, en treitos nos que a pendente da estrada sexa menor, próximas aos itinerarios accesibles e en zonas iluminadas.

Os traballos que se acometerán nas paradas consistirán en melloras do equipamento, como a dotación de marquesiñas, postes, bancos ou apoio isquiático.

Tamén se levará a cabo a mellora da accesibilidade para peóns, en xeral, e para persoas con mobilidade reducida, a través de medidas como a conexión das paradas cos itinerarios peonís, a execución de ramplas de acceso, información en braille ou pavimento podotáctil.

 

Mellorarase a accesibilidade para peóns e persoas con mobilidade reducida a través da conexión das paradas cos itinerarios peonís, a execución de ramplas de acceso, información en braille ou pavimento con podotáctil

 

As obras incluirán medidas de seguridade, tamén con perspectiva de xénero, procedendo á eliminación de vexetación, á mellora da visibilidade e da iluminación ou á ampliación do espazo ao redor das paradas.

Ademais, as intervencións prevén o reforzo da información e da sinalización, colocando planos de situación e percorridos ou sinais indicativos das paradas.

Criterios homoxéneos
Co obxectivo de levar a cabo actuacións con criterios homoxéneos, incorporando as boas prácticas aprendidas nos últimos anos en actuacións similares, desenvolvéronse dous documentos técnicos que servirán como folla de ruta para a execución destas melloras.

Así, empregaranse a “Guía para o deseño de paradas de autobús na Rede Autonómica de Estradas de Galicia” e as “Recomendacións para os cruces de peóns nas inmediacións das paradas de autobús situadas no dominio público viario autonómico”.