A Asociación Solidariedade Galega co Pobo Saharauí segue a buscar novas familias de acollida para o programa Vacacións en Paz deste verán. Dito programa consiste na acollida temporal durante os meses de xullo e agosto de nenas e nenos residentes nos campamentos de refuxiados saharauís ofrecendo a posibilidade de gozar dunha estancia agradable, humana e culturalmente rica.

Nestes campamentos viven ao redor de 165.000 persoas e dependen case por completo da axuda internacional. Os campamentos están ubicados no suroeste do territorio arxelino, en pleno deserto do Sahara, no que son frecuentes temperaturas de 1 grao no inverno e ata 60 no verán, o cal sumado a difícil situación sociopolítica fai que a vida sexa moi complicada.

Ademais, a histórica compañía Teatro Airiños que este ano celebra o seu 90 aniversario, fará unha función benéfica da obra República Sideral a favor de SOGAPS o día 5 de marzo na Sala Arcos Moldes do Auditorio de Rianxo ás 19.00 da tarde. Nas súas redes sociais estará toda a información sobre a compra de entradas e a posibilidade de facer doazóns para a butaca cero.

Máis información sobre o programa Vacacións en paz sen compromiso no teléfono 678 727 382, no correo-e sogaps.oficial@gmail.com e no sitio web da asociación.