Sete petiscos, sete cociñeiros e sete cidades. De Tapas por Galicia 2023 poñerá a competir a sete cociñeiros das principais cidades galegas nunha aposta de Turismo de Galicia pola promoción do turismo urbano aderezada pola súa oferta gastronómica. E entre eles estará, Ana Vilar Álvarez de Cervexaría Leria coa súa Xema na Fraga.

A VII Gala Show Cooking "Mellor Cociñeiro de Tapas por Galicia" terá lugar o 21 de marzo no Hotel Monumento San Francisco, en Santiago de Compostela. Unha cita consolidada que vai xa pola súa sétima edición e que deixa patente a variedade e creatividade da gastronomía galega, mais enmarca tamén ditas experiencias en cidades atraentes e dinámicas cunha historia e cultura de seu.

Nos concursos de tapas celebrados durante o ano 2022 nas cidades da Coruña, Ferrol, Lugo, Ourense, Vigo, Pontevedra e Santiago de Compostela foron seleccionados os 7 cociñeiros que participarán nesta gala. O roteiro suxerido percorrerá a xeografía galega no sentido das agullas do reloxo ata rematar en Santiago de Compostela, destacando algúns dos seus principais recursos turísticos urbanos, xunto coa proposta de tapa representante de cada cidade.

Afeccionada á repostería desde pequena, Ana Vilar comezou a súa traxectoria en diferentes locais da cidade olívica. Con 27 anos, incorporouse á Cevexaría Leria desde o comezo do proxecto en 2021, e desenvolveuno man a man con Pablo Fontán que, en 2018, lanzou Irmaos de Lei, una cervexa artesá.  Desa paixón, xurdiu a idea de montar un local de certeza artesanal en Vigo. A cociña é unha fusión de tradicional cun toque moderno e o seu prato estrela e un  muffin de guiso de carrilleiras ao viño tinto.

Ana e Pablo presentáronse ao concurso Petisquiño disque para pasalo ben e darse a coñecer na súa cidade, xa que abriran o seu local apenas tres meses antes da celebración da edición do 2022. Fixérono coa proposta Xema da fraga,  que representa un cogomelo no monte, a través dunha composición cunha tella de oliva negra, unha xema do ovo como sombreiro do cogomelo, macerada con salsa de soia e yuzu, inxectada con salsa de curry e mazá. A iso, súmase un salteado de diferentes cogomelos representando a terra. Trátase de toda unha homenaxe ás tardes familiares de recollida de cogomelos e a excitación de atopar un bo exemplar escondido entre as ramas caídas.

As outras propostas
Xunto coa de Ana, o resto das propostas que os chefs presentarán ao concurso constitúen un verdadeiro repaso a algúns dos máis salientables produtos de calidade que definen a gastronomía galega. Así, Sheila Martínez, do restaurante Roots da Coruña apostou polos chocos, mentres que Álex M. Bacelo e Mar Lago, do Bacelo, de Ferrol, inclináronse polo touciño e, na cidade das Burgas, Beatriz Alcalá de La Zapatería del Abuelo, escolleu un dos produtos de outono por excelencia, como é a cabaza. Xa en Pontevedra, Rubén González de “El Cafetín” optou polo bacallao; mentres que a base de Álvaro Villasante do Restaurante Paprica de Lugo, será o bonito. E, como sobremesa, ao chegarmos a Santiago de Compostela, que mellor que unha peculiar torta de améndoa da man de Álvaro Pérez, do ArteSana Gastrobar.

Os sete cociñeiros disputarán por dous galardóns. Por unha banda, o premio do xurado profesional, que estará integrado por Lucía Freitas, representante do Grupo Nove; Marta Fernández, directora do Centro Superior de Hostalería de Galicia (CSHG); Laura García del Valle, xornalista e autora de “La Galicia del plato pequeño”; por Cesáreo González Pardal, presidente do Clúster de Turismo de Galicia; e Lola Crespo Núñez-Villaveirán, @lolaframbuesa. Todos eles valorarán cada tapa segundo a súa complexidade técnica, creatividade, presentación e sabor. Por outra, o premio do xurado popular, que se elixirá mediante un sistema de televotación. Os dous gañadores faranse con cadanseu trofeo acreditativo e un vale de até 500€ que poderán trocar en restaurantes do Grupo Nove.

A cita enmárcase na estratexia que Turismo de Galicia desenvolve para promover este tipo de turismo cultural e de proximidade, a través da cooperación entre as empresas do sector, as asociacións e as institucións.