O Porriño contará cunha nova área de aparcamento para caravanas e autocaravanas, localizada no centro urbano do municipio, unha prestación que se suma ás que xa ofrece a localidade.

O alcalde, Alejandro Lorenzo, acompañado polo presidente da Asociación de Autocaravanas de Galicia (Aga), Manuel Fernández-Arruti, e o concelleiro de Vías e Obras, Ramón Porto, visitou a parcela onde se habilitará o novo aparcamento para avaliar xuntos as actuacións necesarias para a súa posta en marcha.

A nova zona de aparcamento ocupará uns 200 m2 da parcela de Leandro Diz, actualmente un estacionamento gratuíto, e estará dotada de todos os servizos necesarios.

“O turismo en autocaravana é unha alternativa consolidada ás viaxes tradicionais, caracterizada pola súa liberdade. É unha modalidade en auge coa que hai moita demanda, e por iso moitos concellos de todo o país xa ofrecen este servizo. O Porriño tamén se suma a esta iniciativa”, explicou o alcalde, Alejandro Lorenzo.