Unha vintena de coches foron calcinados na madrugada de hoxe en Tui, debido a varios incendios simultáneos en distintas rúas da cidade. Os equipos de emerxencias e as forzas de seguridade tiveron que actuar na zona para sufocar o lume e evitar danos maiores.

Segundo as primeiras hipóteses, os lumes foron intencionados e os vehículos atopábanse estacionados no centro histórico da cidade, onde non existía vixilancia. Os coches afectados, un total de 21, estaban estacionados nas rúas Calvo Sotelo, Ordóñez, Tide, Piñeiro e praza Armada. Ademais dos vehículos, tamén resultaron danadas algunhas vivendas, principalmente os cristais das xanelas debido ás altas temperaturas.

A maioría dos vehículos danados quedaron totalmente calcinados e ata o momento non se produciu ningunha detención relacionada co incidente.

No operativo de extinción e seguridade, participaron os bombeiros do Porriño - Baixo Miño e de Valença, as forzas e corpos de seguridade da comarca e os efectivos de Protección Civil de Tomiño, Tui, O Porriño e Salceda. A pesar dos esforzos, os danos materiais foron considerables.

As autoridades iniciaron unha investigación para esclarecer os feitos e atopar aos responsables deste acto vandálico que causou unha gran alarma social na cidade.