A conselleira de Infraestruturas e Mobilidade, Ethel Vázquez, destacou que a Xunta está destinando un investimento de 50 M€ cada ano para manter e mellorar a seguridade nas estradas, facendo da rede autonómica galega un referente en conservación viaria. Vázquez Mourelle participou nunha mesa redonda Estradas ao servizo do cidadán, retos e exixencias, que se celebra no marco da 32 Semana de la Carretera, xunto co director da Axencia Galega de Infraestruturas, Francisco Menéndez.

A conselleira sinalou que o Goberno galego está a traballar para eliminar todos os tramos de concentración de accidentes nas estradas autonómicas, cun investimento de máis de 15 M€ que xa permitiu reducir en case un 60% a sinistralidade neses "puntos negros". Ademais, está a desenvolver un Plan de reforzos de firme, ao que dirixe cada ano un orzamento de preto de 20 M€.

Vázquez tamén puxo o acento no Plan de control de pontes e obras de paso co que a Xunta prevé realizar en total 1.600 inspeccións en 5 anos e que xa motivaron numerosas obras preventivas. Este control esténdese tamén aos noiros, unha liña necesaria debido ao contexto climático.

A conselleira destacou que a Xunta xestiona unha rede de 5.500 km de estradas, en cuxas marxes se construíron xa 250 km de sendas peonís e ciclistas, coa vocación de continuar facéndoo. E chamou a seguir traballando para que a estrada sexa parte da mobilidade sostible e non a súa antítese.

Por outra banda, instou ao Goberno de España a afrontar con rigor a conservación da súa rede para que as estradas volvan ser un factor de cohesión social e competitividade económica e non, precisamente, todo o contrario. Lamentou que en Galicia haxa 3 autovías estatais para conectar co resto de España e as 3 presenten problemas sen unha planificación clara de como resolvelas.

A conselleira abordou tamén os retos de futuro da xestión das estradas, que son a conservación, a sostibilidade e o aproveitamento tecnolóxico, preparando o terreo para a chegada do vehículo eléctrico, autónomo e conectado. Galicia está a impulsar unha Estratexia de dixitalización integral das estradas autonómicas, prevendo investir 14 M€ nos próximos 5 anos, e a desenvolver un "xemelgo dixital" da rede viaria, supoñendo un salto na xestión de 150 anos nalgunhas estradas.