O Concello de Porriño decretou tres días de loito oficial polo tráxico falecemento dun neno esta tarde en Porriño.

O alcalde, Alejandro Lorenzo, trasladou á familia do neno, no seu nome e no de toda a corporación, a súa máis sentido pésame e a man tendida do Concello para todo o que necesiten nestes duros momentos.

Así mesmo, acordouse suspender as festividades de Porrigalia programadas para esta fin de semana como sinal de respecto e loito. As bandeiras do concello xa ondean a medio mastro.

O neno de tres anos de idade morreu este xoves en Porriño, posiblemente como consecuencia dun golpe de calor, ao permanecer supostamente varias horas nun coche estacionado ao sol, mentres a súa nai acudía ao traballo.

Foi pouco antes das catro da tarde cando a proxenitora, alertada polo pai do menor, decatouse do seu terrible descoido, segundo informan algúns medios locais. Unha vez avisados os equipos de emerxencia, os facultativos que se presentaron no lugar non puideron facer nada polo pequeno e só certificaron o seu falecemento.

Segundo outras fontes, a nai do menor dirixiuse ao redor das 10:00 horas a traballar á sede dunha farmacéutica, na parroquia de Torneiros. Estacionou o seu coche no aparcamento de terra adxacente a outro de asfalto que nese momento estaba completo e dirixiuse ao seu traballo na planta, sen darse conta de que o seu fillo aínda estaba sentado na cadeira adaptada do asento traseiro. Ao parecer, a nai debía deixar ao seu neno na gardería antes de acudir á fábrica, pero non o fixo, posiblemente porque o menor quedou durmido e despistouse dirixíndose de xeito rutinario á empresa.

Garda Civil e Policía Local investigan o tráxico suceso.