A vicepresidenta primeira da Deputación de Pontevedra, Marta Fernández-Tapias, participou este xoves na presentación da XXVI Regata de Cruceiros do Real Club Náutico de Aguete, que terá lugar os vindeiros 5 e 6 de agosto, “unha das probas náuticas de maior arraigo e tradición en Galicia e que este ano cumpre 20 anos ininterrompidos sendo puntuable para a Copa de España, o que a converte na máis lonxeva de entre as galegas neste ámbito”.

Durante o acto, a vicepresidenta da Deputación, Marta Fernández-Tapias, quixo agradecer ao Real Club Mar de Aguete a súa implicación co deporte e os seus preto de 50 anos de organización de eventos náuticos de primeiro nivel na Ría Pontevedra. Consciente do esforzo que supón a organización deste tipo de eventos, comprometeuse persoalmente a dar un importante impulso á vela, non só como actividade deportiva, senón tamén polo seu alto valor turístico.

Así, manifestou o seu "firme compromiso" co deporte e tamén coas persoas e entidades que o promoven, para engadir que "a aposta pola promoción das actividades deportivas será un dos grandes obxectivos deste mandato que acaba de comezar".

No acto de presentación, ademais da vicepresidenta, tamén estiveron presentes o vicepresidente do Real Club de Mar de Aguete, Raúl Oltra de Santiago; o tenente de alcalde de Marín, Manuel Santos; o comandante-director da Escola Naval de Marín, Pedro Cardona; o presidente do Casino Mercantil de Pontevedra, Roberto Vega; a comodora do Real Club de Mar de Aguete, Celina Torrado; o representante de Luz Solidaria, Jaime Jaquotot, e os concelleiros de Marín Marián Sanmartín e Hugo González.