O BNG de Salvaterra de Miño mantivo unha xuntanza o venres 4 de agosto coa xunta directiva da Comunidade de Montes Veciñal de Salvaterra para coñecer de primeira man a situación do polígono Chan da Ponte ante a disputa xudicial que esta mantén co goberno do Concello de Salvaterra.

A Comunidade de Montes que conta con 120 comuneir@s ten claro que o obxectivo é por ao servizo da veciñanza de Salvaterra os dereitos que lle pertencen, como demostra a sentencia xudicial do pasado mes de maio que devolve unha parcela a favor da Comunidade Veciñal e que abre a posibilidade de facer máis reclamacións. O Concello volveu recurrir dilatando este proceso.

Dende a Comunidade de Montes declaran que o solo do polígono Chan da ponte pertence a veciñanza, por moito que o goberno do Concello o rexistrara ao seu nome e o vendera incurrindo nunha suposta prevaricación. A Comunidade explorou a posibilidade de chegar a un acordo co goberno municipal, atopándose coa negativa por resposta, o que supuxo a imposibilidade de avanzar por esta vía e non deixou máis saída que acudir a Xustiza.

Dende o BNG lembrámoslle ao Concello que a propiedade comunal é privada, e  as adminsitracións públicas deben respectar e defender este tipo de entidades e de propiedade. Así, como facer unha proposta seria e sensata que lle dea seguridade ás empresas en vez de enrocarse nunha posición victimista sin sentido que só perxudica a veciñanza de Salvaterra.