O deputado provincial Jorge Cubela denunciou este sábado que o “sectarismo constante” do grupo socialista lle impide facer autocrítica da “nefasta xestión económica” do anterior goberno da Deputación de Pontevedra. Tras a avaliación interna das contas realizada polo goberno provincial, Cubela sinalou que o Partido Socialista, “aínda descolocado” despois dos resultados electorais de maio, “pretende agochar un balance que deixa nas arcas da Deputación unha situación preocupante ata aprobación duns novos Orzamentos, que levarán o selo de rigor e solvencia do novo goberno presidido por Luis López”.

Cubela constatou que o da provincia é un novo exemplo da nefasta capacidade xestora dos socialistas, que, unha vez máis, volve poñer en risco o futuro dos cidadáns. Do mesmo xeito, fixo un chamamento aos grupos da oposición a que entendan “a mensaxe das urnas” e se poñan a traballar a favor dos intereses da provincia.

“Fronte a transparencia do novo equipo de goberno, lamentamos que outros sigan instalados na cegueira partidista”, abundou. Cubela convidou aos socialistas a que abandonen “a crispación” e os “intentos desesperados por defender unha herdanza económica inxustificable” para realizar a oposición “construtiva e seria” que agardan os pontevedreses.

O deputado provincial lembrou que o novo executivo de Luis López herda unha situación complexa, con apenas un 6,5,% de orzamento dispoñible para atender os investimentos noutros concellos, asociacións e terceiros; e con partidas practicamente esgotadas ou comprometidas en áreas como Cooperación, Deportes, Cultura ou Turismo. Na mesma liña, concluíu ou que o actual goberno provincial, malia esta circunstancia, fará todo canto estea na súa man para atender aos cidadáns ata a aprobación das novas contas.