O pasado venres, o eurodiputado socialista Nicolás González Casares, achegouse ata as Pedriñas para participar nun encontro con representantes dos colectivos da parroquia e membros do Partido Socialista de Mos. Nesta xuntanza estiveron presentes as concelleiras Delfina Rodríguez e Victoria Alonso, así como representantes da Plataforma Auga é vida e da Comunidade de Montes de Tameiga.

A reunión comezou cun resumo da situación actual e unha explicación dos antecedentes que levaron “ás constantes denuncias relacionadas coa Cidade Deportiva que o Celta constrñue en Mos”. Os representantes dos colectivos compartiron as súas preocupacións e propuxeron posibles solucións para esta cuestión medioambiental.

Nicolás González, eurodiputado socialista, asesorou aos presentes sobre os mellores pasos a seguir e comprometeuse a levar a problemática ao Parlamento Europeo. Sinalou a importancia de que Europa coñeza a situación das instalacións deportivas e as cuestións legais relacionadas coas súas licenzas.

Ademais, abordaron as preocupacións sobre o uso dos recursos hídricos e outros aspectos medioambientais relacionados co proxecto. Tanto o eurodiputado como as representantes do grupo municipal expresaron a súa disposición a colaborar con outras administracións para resolver esta situación que califican de “crítica”.

Victoria Alonso concluíu a reunión subliñando que "o Partido Popular debe reconsiderar as súas accións, xa que están a permitir que un único empresario faga negocio en detrimento do municipio mosense. Lembrou tamén a importancia de protexer a auga e o patrimonio natural e arqueolóxico".