O presidente da Deputación de Pontevedra, Luis López, avanzou a firme aposta da institución polos investimentos nos concellos da provincia nunha carta dirixida aos 61 alcaldes e alcaldesas locais.

Na misiva, López reiterou o seu compromiso persoal e o do goberno que preside de apoiar con investimentos os proxectos de todos os concellos, sinalando que esta vontade colaborativa será reflicta nos Orzamentos Provinciais para o ano 2024, que están a ser elaborados polo goberno provincial. "As contas terán como prioridade reforzar os investimentos nos concellos", subliñou o presidente na carta.

O dirixente provincial expresou a súa disposición de "tender a man a todos os rexedores", asegurando que os alcaldes poden contar coa "máxima colaboración" da Deputación neste novo mandato.

López tamén destacou a importancia de manter relacións institucionais fluídas e frutíferas cos representantes dos 61 concellos da provincia, afirmando que esta nova etapa na Deputación estará marcada pola cooperación e polo compromiso coas necesidades tanto específicas como comúns dos municipios. O presidente resaltou que este ofrecemento é unha resposta ao desexo expresado pola cidadanía pontevedresa nas urnas no pasado mes de maio, que demandou "máis moderación, máis colaboración e menos conflitos innecesarios".

A carta concluíu cun chamamento aos alcaldes e alcaldesas da provincia para manter encontros institucionais e así sentar as bases dunha colaboración efectiva e abordar asuntos de interese común.

O presidente López reafirma así o compromiso da Deputación de Pontevedra de traballar xunto cos concellos para o benestar e o progreso de toda a provincia.