A Deputación de Pontevedra acaba de convocar as axudas para a formación de mulleres en postos técnicos deportivos na provincia, ás que se incorporan xuízas e árbitras. Ata o de agora esta liña de apoios, enfocada a incrementar a presenza de feminina en todas as disciplinas e ámbitos deportivos, nos equipos tanto de base como de elite, financiaba exclusivamente os estudos ás adestradoras e técnicas.

Como novidade, por primeira vez a institución provincial cubrirá o 100% da matrícula, ata un máximo de 600 euros (+20% que no 2022). As mulleres interesadas en beneficiarse desta iniciativa, dotada con 25.000 euros, teñen de prazo ata o 30 de novembro e desde este mércores, 27 de setembro, para solicitalas preferentemente a través da sede electrónica da Deputación. A convocatoria sufragará os gastos de matrícula dos títulos oficiais que dan acceso aos postos de adestradora, técnica, xuíza ou árbitra nas diferentes modalidades.

Os estudos deben ser impartidos polas federacións deportivas autonómicas ou estatais ou nos centros de ensinanzas deportivas de réxime especial, iniciados en 2023 e rematados ou ben neste ano ou ben comprendendo o ano lectivo 2023/2024. Para poder acceder ás axudas, ademais, as interesadas deben ser nadas na provincia ou residentes desde o 1 de xaneiro do presente ano.

Na actualidade unicamente o 10% dos postos técnicos ou profesionais vinculados co deporte son ocupados por mulleres. A través destas axudas a estudos, a Deputación busca que máis mulleres poidan ocupar altos cargos de decisión en organizacións deportivas.