O Concello de Mos e AECC Mos organizaron a conferencia titulada ‘FaleMOS sobre cancro de mama’ a cargo do Doutor Gonzalo de Castro, ciruxano de mama e membro da Unidade de Mama da Área Sanitaria de Vigo que se celebrou esta tarde con motivo do Día Internacional da Loita contra o Cancro de Mama e na que expuxo as claves para a prevención e sensibilización.

O encontro deu comezo ás 20:30 horas e contou coa participación de Francisco Javier Puente Prieto, Xerente da Área Sanitaria de Vigo, que estivo acompañado pola alcaldesa de Mos, Nidia Arévalo, e a concelleira de Política Social, Sara Cebreiro. O evento tivo entrada libre e celebrouse no auditorio do Pazo de Mos con gran éxito de afluencia.

Sobre a conferencia e o seu ponente a rexedora local mosense, Nidia Arévalo, destacou que “é unha honra contar cunha eminencia no cancro de mama como é o doutor de Castro, xa que na loita contra o cancro de mama aínda queda moito por conseguir, e a prevención é fundamental. É un verdadeiro luxo poder escoitar ao Doutor Gonzalo de Castro e, con iniciativas coma esta, desde o Concello de Mos e AECC Mos apostamos pola sensibilización sobre esta enfermidade, de gran importancia na loita contra unha doenza que supón unha verdadeira lacra social e sanitaria”.

Gonzalo de Castro é un ciruxán cunha ampla traxectoria de dedicación exclusiva á cirurxía da mama, con formación altamente cualificada, gran actividade científica e docente, e recoñecido coa certificación europea da UEMS (European Board of Surgery Qualification in Breast Surgery).

En 2012 converteuse no segundo español en conseguir a acreditación europea desta especialidade.

Gonzalo de Castro considera que as revisións son fundamentais para detectar a tempo o cancro de mama. É cirurxián do CHUVI e deu esta conferencia en Mos para resaltar a importancia da prevención contra este tumor. Salientou a importancia de previr e detectar a tempo o tumor que máis afecta ás mulleres.

O doutor Gonzalo de Castro Parga, forma parte da Unidade de Patoloxía Mamaria do CHUVI e na súa charla falou sobre a importancia da detección precoz, que segue sendo o método máis eficaz para loitar contra esta enfermidade. Por iso é moi importante someterse a probas de diagnóstico precoz, xa que se o tumor é detectado na súa etapa inicial, as posibilidades de curación son máis altas.