A delegada territorial da Xunta de Galicia en Vigo, Ana Ortiz, participou este xoves nunha nova reunión no Concello de Vigo para trasladar a disposición do Goberno galego a colaborar cos responsables municipais na búsqueda de solucións para as familias afectadas polo incendio do rúa Alfonso X O Sabio. A representante autonómica mantivo a posibilidade de firmar un convenio de colaboración no que a Xunta participaría coa súa financiación.

Ortiz lembrou que a Xunta fixo todo o que está dentro das súas competencias para atender aos afectados e que “sempre mostramos a nosa vontade de achegar solucións aos problemas das familias”. Ademais, apuntou que é o Concello de Vigo o que ten todas as competencias para actuar nestas situacións de necesidade social. “A Xunta exercía as competencias que ten asignadas e nunca deixou de facelo”, indicou.

Así, destacou que a Consellería de Política Social xa estaba a atender durante o día nun centro a algúns dos nenos que vivían no edificio da rúa Alfonso X O Sabio a través dun programa de reforzo social e educativo e, ademais, algunhas das familias estaban a recibir prestacións básicas como a Risga ou pensións non contributivas, que lles permitían ter ingresos para a compra de produtos básicos.

Indicou así mesmo que despois da traxedia, o Goberno galego atendeu coa máxima celeridade aos nenos que estaban en risco de exclusión e por iso asumiu a tutela da menor hospitalizada na Coruña e a garda de dous irmáns que tamén vivían no inmoble.

Por último, engadiu que a administración autonómica pon á disposición todos os programas de axudas existentes co fin de que as familias afectadas, se cumpren os requisitos, poidan dispoñer dos recursos adecuados para alugar unha vivenda.