O grupo municipal do PP de Tomiño solicítalle ao goberno local, despois de que votara contra a súa moción de apoio ao comercio e respondera con excusas ao seu rexeitamento a estas medidas, que modernice e mellore as accións de colaboración con este sector, xa que considera que as actuais son “escasas e ineficientes, tal e como nos levan trasladando os propios comerciantes durante bastante tempo”.

“É incrible que digan que manipulamos porque é innegable que votaron contra a nosa moción de apoio ao comercio e tamén é innegable que o centro de Tomiño está cada día máis baleiro e os establecementos cada vez teñen menos clientes. E non dubidamos de non estean a facer cousas para o sector, pero está claro que as súas propostas estanse a quedar arcaicas e aos comerciantes non lles serven absolutamente para nada”, explicou a voceira municipal, Lara Meneses.

Ademais, os populares acusaron ao goberno nacionalista de mentir por soster que rexeitaron a moción do PP porque todas as propostas incluídas na mesma xa están en marcha: “O BNG só busca xustificar o seu vota contra o comercio local, porque en Tomiño hai pouca programación, hai un gravísimo problema de aparcamento que baleira o centro urbano e non hai unha colaboración eficaz co sector”.

“A nosa moción incluía todo o que non hai no noso concello para apoiar aos comerciantes, porque non temos Bonos Comercio, para os que propoñemos a razoable cifra de 12.000 euros, non hai campañas periódicas e constantes, nin Noite Branca, nin eventos especiais como concertos ou gastronomía, que son medidas que se demostran exitosas en moitos outros municipios”, apostillou Meneses.

A concelleira popular acusou, deste xeito, ao BNG de “botar balóns fóra e poñer excusas agochándose detrás dunha nota de prensa que non oculta a absoluta realidade de que votaron contra a nosa proposta, que está feita en positivo, con propostas novidosas e modernas e que se pretende revitalizar e axudar a un sector fundamental para o futuro de Tomiño”.

Ademais, o PP local amosou o seu asombro de que o goberno nacionalista presuma da tenda dixital posta en marcha desde o Concello para os comerciantes durante a pandemia da covida-19, “xa que é un absoluto e unánime fracaso e os propios comerciantes da vila e do municipio sempre lamentan que eses cartos non se investiran noutras accións de dinamización para o sector”.

Finalmente, e tras advertirlle ao goberno local que non van conseguir “amendrentar” á oposición por cumprir coa súa obriga de fiscalizar a acción do executivo e facer propostas en positivo para Tomiño, os populares acusáronos de demagoxia sobre as accións lúdicas e culturais: “Que non tersiverxen as nosas palabras, porque nós claro que estamos a prol da cooperación transfronteiriza, porque vivimos na raia e temos moita e moi boa relación cos pobos de Portugal, pero tamén estamos a prol de que haxa moita máis actividade no centro de Tomiño e aí o goberno local frouxea moito”.