Un dos proxectos máis agardados pola veciñanza porriñesa está xa en marcha: a construción dun novo auditorio municipal. Este proxecto, considerado unha das principais demandas culturais da localidade, ven dar resposta ás necesidades de contar cun espazo axeitado para a cultura, o ocio e o entretemento.

“Como sempre dixen, para min é un reto que O Porriño se convirta tamén na cidade da Cultura. Temos o esencial, un tecido asociativo veciñal e cultural con iniciativa e moi dinámico, unha programación cultural anual e unha veciñanza con enormes inquedanzas, pero carecemos de instalacións propias que nos permitan localizar e visibilizar toda isto”, explicou o alcalde, Alejandro Lorenzo. “Necesitamos un auditorio á altura do Porriño”.

Para materializar este obxectivo, o Goberno Municipal dará o primeiro paso e levará a cabo a aprobación do investimento necesario para poñer en marcha este ambicioso proxecto. O novo auditorio municipal erguerase xunto ao Centro Cultural Municipal, ampliando o edificio e completando a obra coa urbanización da parcela e da rúa Fernández López, proporcionando un acceso sinxelo aos veciños. A zona proxima albergará outros importantes equipamentos culturais, como o Círculo Recreativo Cultural, o Centro Cívico e o local multiusos municipal, formando así un espazo público de calidade para toda a comunidade. O proxecto está deseñado para converterse no "centro neurálxico cultural e social da vila".

A inversión estimada para a construción da nova sala e a urbanización do conxunto da parcela ascende a 1.871.870 euros, e 360.000 euros están destinados á renovación da rúa Fernández López. Ademais, anticipase a necesidade dunha partida de 30.000 euros para a dirección das obras no momento da súa execución. O importe total da inversión proposta é de 2.261.870 euros.

“Estamos ante un investimento necesario dado que o aforo do actual auditorio resulta insuficiente para as necesidades reais da veciñanza, tendo que acudir a entidades privadas como é o Círculo Recreativo Cultural para dar cabida a algún dos eventos programados polo Concello”, sinalou o alcalde. En canto á financiación, está en proceso a negociación de convenios con axentes financiadores externos como a Xunta de Galicia, a Deputación Provincial e o Estado a través do Mecanismo de Recuperación e Resiliencia (MRR- Fondos NextGeneration EU). O Concello comprométese a aportar 900.000 euros como contribución municipal a través dun crédito extraordinario.

“Será unha realidade e antes de que remate esta lexislatura abrirá as súas portas, comprométome”, concluíu Alejandro Lorenzo.