O Concello do Porriño acolleu hoxe o acto de entrega dos novos carnés de voluntariado de Protección Civil, presidido pola delegada territorial da Xunta en Vigo, Ana Ortiz. Xunto co alcalde, Alejandro Lorenzo entregaron un total de 37 renovacións de carnés, 10 deles aos voluntarios do Porriño, 5 aos da agrupación de Salceda, 18 á do Val Miñor, 3 á de Redondela e 1 á de Moaña.

Tanto a representante autonómica como o rexedor destacaron o importante labor que realizan estas agrupacións, das que salientaron a súa vocación de servizo público.

“O papel que fai Protección Civil é insubstituíble e supón un dos grandes avances nunha sociedade que pretende avanzar e mellorar”, sinalou Ana Ortiz. A delegada tamén destacou que “nun mundo como o actual debemos ter referencias como as vosas, persoas desinteresadas, que achegades horas, esforzo, traballo e, sobre todo actitude, porque estades sempre no lugar que facedes falta dispostos a axudar”.

Pola súa banda, Alejandro Lorenzo, agradeceu o “traballo desinteresado destes voluntarios e voluntarias sen os cales moitas veces sería moi difícil prestar unha boa atención en momentos de emerxencia. O seu labor é esencial para o noso pobo”.