O vindeiro 22 de decembro comezará o Campamento de Nadal organizado pola Concellería de Igualdade do Concello do Porriño dirixido aos máis pequenos e pequenas da casa, de idades comprendidas entre os 3 e os 12 anos, ambos inclusive. Tendo preferencia os empadroados no Porriño.

Esta actividade terá lugar os días 22, 26, 27, 28 e 29 de decembro de 2023 e o 2, 3, 4 e 5 de xaneiro de 2024, en horario de mañá de 9 h a 14 h.

As inscricións poderán facerse presencialmente por rexistro ou por sede electrónica. O prazo abriuse hoxe luns e rematará o 12 de decembro ás 9 h.

A listaxe de admitidos e admitidas publicarase na páxina web do Concello. Máximo 50 participantes. Seguirase a orde de inscrición, previa baremación das solicitudes que acrediten a concorrencia de algunha circunstancia computable.

O lugar de entrega e recollida dos e das participantes será na porta principal do pavillón municipal no horario indicado. Os rapaces e rapazas deberán levar roupa cómoda, calzado cómodo e outro de reposto para poder utilizar no seu caso as pistas deportivas, unha mochila co calzado de resposto, unha merenda e auga.

No caso de precisar algunha vestimenta diferente, serán as monitoras e monitores as persoas encargadas de comunícalo.

O formulario de inscrición pode descargarse da páxina web municipal.