Abel Caballero reuniuse esta semana co sector hoteleiro, hostaleiro, comercial e de servizos para avaliar o rendemento turístico e a acollida de visitantes na cidade durante o período de Nadal. Ao rematar o encontro, o alcalde destacou o "bo funcionamento, describindo o Nadal como excepcional e subliñando o alto nivel de satisfacción dos turistas".

"Constatamos a asistencia de visitantes cunha ocupación practicamente total. É evidente que tivemos un Nadal excepcional que continúa a atraer turismo e proporciona un alto grao de satisfacción", expresou o rexedor diante do sector que ofrece servizos para recibir turistas e visitantes durante a época natalicia. Caballero tamén resaltou, a pesar dos numerosos e contínuos problemas de tráfico que sofre a cidadanía nestas datas, "a capacidade do sector para manexar situacións complexas, como o control do tráfico con miles de vehículos procedentes de diferentes lugares de Galicia, España e Portugal".

O alcalde enfatizou que o Nadal posicionou a cidade de Vigo no mapa, "converténdoa nun espazo de publicidade e coñecemento difícil de imaxinar nunha cidade do tamaño de Vigo". Destacou a importancia da "Marca Vigo" asociada ao Nadal," xerando turismo non só nesta época, senón tamén ao longo do ano". Caballero tamén subliñou a relevancia de "manter a posición de Vigo como a primeira cidade de España no ámbito natalicio".