"Acende o Camiño de Santiago", a iniciativa da Xunta de Galicia, iluminará de maneira especial ata o 8 de xaneiro máis de medio cento de monumentos e edificios emblemáticos do Camiño de Santiago, incluíndo a Delegación da Xunta en Vigo e o Museo do Mar de Galicia.

Esta iniciativa enmárcase nas diversas accións levadas a cabo por Turismo de Galicia durante estas datas baixo o produto de promoción "Nadal en Galicia", que engloba diversas propostas que se desenvolven nas catro provincias, convidando a galegos e visitantes a descubrir o destino tamén no Nadal, destacando así o seu potencial turístico.

Deste xeito, o Camiño Portugués da Costa ve iluminados os seus monumentos na provincia de Pontevedra, entre os que se atopan a Capela Santa Liberata de Baiona, a Torre do Reló de A Guarda, o Pazo de Mos, a Delegación da Xunta e o Museo do Mar de Galicia en Vigo.