O candidato socialista á Presidencia da Xunta, José Ramón Gómez Besteiro, anunciou  a súa participación na manifestación convocada en Santiago o próximo 21 de xaneiro en rexeitamento "á xestión da crise dos pélets e en defensa do noso mar". A declaración foi feita durante un encontro coa Confraría de Pescadores de Lira en Carnota.

Gómez Besteiro expresou o compromiso dos socialistas galegos coa causa mariñeira e destacou a importancia de loitar contra as mentiras que, segundo el, están a ser impoñidas pola Xunta, o PP e o presidente Rueda. Neste sentido, confirmou que o PSdeG será o primeiro partido en sumarse á manifestación, mostrando o seu apoio ás demandas dos pescadores, mariscadoras, biólogos, ecoloxistas e voluntarios.

O candidato criticou a xestión do goberno galego na crise dos pélets, facendo referencia ao último cambio de rumbo na xestión da marea plástica. Besteiro mencionou a recente creación dunha Comisión pola conselleira de Medio Ambiente para analizar a toxicidade dos pélets, despois de semanas de negación por parte do goberno autonómico.

Durante a visita a Carnota, Gómez Besteiro fixo un chamamento á colaboración entre a Xunta e o Estado neste momento de crise, sinalando a importancia da coordinación entre as administracións. Ademais, anunciou que os socialistas galegos farán un seguimento rigoroso das tarefas de limpeza, traballando para poñer fin á marea plástica.

A visita incluíu un percorrido pola praia de Portocubelo en Lira, onde Besteiro estivo acompañado por representantes do sector mariñeiro da zona, membros da candidatura e alcaldes socialistas da Costa da Morte, como Juan Manuel Saborido de Carnota, Sandra Ínsua de Camariñas, Margot Lamela de Cee, Raúl González de Dumbría e Mónica Rodríguez de Vimianzo.